Mbonigaba avuga ko yabuze ababyeyi akiri muto, agatangira guhangayika bikomeye aho yabaga mu nkambi, avuga ko yaryaga rimwe na rimwe, iyo yarwaraga ntaho yivurizaga, kwiga byari bigoye kuko bigiraga mu mashuri mabi adakwiye ,yambaraga umupira umwe nawo usa nabi ugera ku birenge ukaba ariwo mwambaro yambaraga buri munsi ukamubera byose nk’ikabutura n’ipantaro.

Abivuga agira ati “nambaraga umupira umwe ugera ku birenge usa nabi cyane, inshuro nabashije kurya buri munsi zari nkeya cyane, sinashoboraga kujya kwa muganga ndetse n’amashuri babashaga kudushyiramo yari mabi cyane, nari nihebye kuko ntacyo numva nkimaze”.

Mbonigaba avuga ko abagira neza baje kumushyira mu muryango wa Compassion International akabasha kwiga ndetse bamumenyera ibikenerwa by’ibanze yongera kuba umuntu, byatumye yiga kaminuza ya Makerere akayirangiza mu ishami ry’uburezi akaba amaze kugera kuri byinshi birimo kuba asigaye ari umurezi muri uyu mushinga wa Compassion International.

Abivuga agira agira ati “nakomeje gufashwa ndiga ndarangiza ndetse na kaminuza ndayirangiza,ubu nanjye ndi kwigisha abandi bana nkanjye batari bafite icyizere cy’ubuzima bwabo bw’ejo”.

Mbonigaba avuga ko amaze imyaka itanu agarutse mu Rwanda aho ari gukora umwuga w’uburezi muri Compassion International akavuga ko ari ibintu bitangaje kandi byiza kuba umuntu utari ufite icyizere cyo kubaho ari gufatanyiriza n’abandi Banyarwanda kubaka igihugu cyabo.

Mbonigaba amaze amezi 8 yubatse urugo, akaba atuye mu mujyi wa Kigali, ku Kicukiro, muri iyi minsi ari mu batangaga amasomo ku banyeshuri biga muri za kaminuza bafashwa na Compassion International bakoreraga ingando mu karere ka Nyamasheke mu murenge wa Kanjongo.

Umugwaneza Jean Claude