Umuyobozi w’agashami gashinzwe amasuzuma muri NESA Jean Claude Nzeyimana

NESA itangaza ko mu gushyira abanyeshuri mu myanya hakurikijwe amabwiriza asanzwe, kandi ko abanyeshuri bahawe imyanya hakurikijwe amahitamo yabo, kugeza ubwo ibigo byose byuzuye, kandi ko hagiye gutangira gusuzuma ubujurire bwatanzwe kugira ngo n’ibibazo by’umwihariko bishakiwe umuti.

Bimwe mu byari byashingiweho abaturage bivovotera gushyirwa mu myaya kw’abanyeshuri, harimo ku kuba hari abanyeshuri biga mu bigo byigenga boherejwe kwiga kure y’Umujyi wa Kigali aho batuye, bigafatwa nko kugira ngo abo banyeshuri bazananirwe kwiga aho boherejwe bagaruke mu bigo byigenga.

Hari hanavuzwe kandi ko habayeho amakosa yo kuba abanyeshuri barahawe ibigo batahisemo kandi biri kure y’iwabo, hakaba n’abagahabwa amashami atajyanye n’amanota babonye, nk’aho umunyeshuri umwe wabonye zeru mu mibare na zeru mu bugenge yahawe ishami ribihugirje hamwe byose ngo ajye kubyiga, kandi atarabitsinze bigafatwa nk’ikosa ryo kutita ku byo umunyeshuri ashoboye ngo abe ari byo yiga.

Mu bisobanura bitangwa n’abayobozi ba NESA mu mashami ashinzwe amasuzuma no gushyira abanyeshuri mu myanya, bahakana ibyo byose bivugwa kuko ngo ibyakozwe byashingiye ku kuri, kandi ko n’iyo byanasubirwamo ari ko byagaruka bimeze, kubera ko bikozwe mu kuri gushoboka.

Umuyobozi w’agashami gashinzwe amasuzuma muri NESA Jean Claude Nzeyimana asobanura ku banyeshuri bigaga mu mashuri 20 mu Gihugu abantu barwanira cyane, ndetse bavuga ko batahawe muri ayo mashuri bagaragaza kutanyurwa, asobanura ko amashuri yose yo mu Rwanda yigisha kimwe.

Agira ati, “Nk’iyo umuntu avuga ngo umwana wanjye bamwohereje muri GS ibyo ntacyo bivuze kuko hari za GS Officiel de Butare, na Kigeme, ayo ni amashuri hari na za GS zo mu byaro kandi zitsinda neza nk’ejo bundi hari umwana w’i Nyaruguru watsize neza aza mu bambere ku rwgo rw’Igihugu”.

Nta karengane kabayeho mu guhsyira mu myanya abanyeshuri

Ku kijyanye n’abanyeshuri n’ababyeyi bavuga ko barenganijwe ku gushyirwa mu myanya kw’abanyeshuri no koherezwa ku bigo bahisemo, Umuyobozi w’agashami gashinzwe gushyira mu myanya abanyeshuri Kabatesi Beata asobanura ko icyitwa akarengane ari amarangamutima nta kuri kurimo.

Agira ati, “Hari ibyo tugenderaho birimo kubanza gusura ibigo by’amashuri acumbikira abanyeshuri ngo turebe ubushobozi bwo kwakira abanyeshuri, hagakurikiraho gushyira mu myanya abo banyeshuri hagenderwe ku mahitamo yabo”.

Avuga ko abiga amashuri abanza bajya mu wa mbere n’abiga amashuri yisumbuye bahitamo ibigo bine by’amashuri biga bacumbikirwa na bibiri biga bataha, naho abajya mu mwaka wa kane bigakorwa gutyo ariko bo bagahitamo n’amashami bashaka kwigamo.
Kabatesi avuga ko iyo amanota yabonetse bashyira mu myanya hakurikijwe uko amanota yabo arutana, n’imyanya iri mu bigo basabye kwigamo n’amashami basabye, hakurikijwe abanyeshuri bafite amanota menshi.

Agira ati, “Niba umwanna ahisemo nko kwiga ku kigo runaka cyo mu mujyi wa Kigali cyarasabwe n’abagera ku bihumbi birindwi hari imyanya 90, ubwo turareba uwahahisemo ufite amanota menshi, ubwo undi wari wahasabye ufite macye duhita tureba amahitamo ye ya kabiri twasanga ikigo yasabye cyuzuye tukajya ku mahitamo ye ya gatatu kugera tubonye aho yasabye hajyanye n’amanota ye”.

Yongeraho ati, “Iyo umwana amahitamo ye arangiye nta kigo abonye kubera abahasabye bamurusha amanota, tureba ishuri rimwegereye mu Karere ke, twasanga huzuye tukareba mu Ntara twasanga naho huzuye tukareba ahandi hose hasigaye, niho ushobora gusanga umwana yavuye mu Burasirazuba akoherezwa i Burengerazuba, nta makosa aba yakozwe ni uko biterwa n’amanota yagize n’amahitamo ye”.

Umuyobozi w’agashami gashinzwe gushyira mu myanya abanyeshuri Kabatesi Beata

Kabatesi asobanura ko abavuze ko habaye ho ivangura mu mashuri bibeshya kuko babiterwa n’amarangamutima, mu gihe NESA yo ngo ishinzwe gukurikiza umurongo wa leta ngo abane bige neza bitandukanye na mbere ubwo abayobozi b’ibigo by’amashuri bajyaga kwihitiramo abanyeshuri.

Agira ati, ‘Uburyo dukoresha bw’ikoranabuhanga butuma habaha umucyo mu gushyira abanyeshuri mu myanya no mu mashami bahawe, bikuraho kandi ikimenyane cy’abayobozi b’ibigo by’amashuri batangaga imyanya uko bishakiye ku nyungu zabo bwite”.

Ku kijyanye n’abavuga ko hariho abanyeshuri bava mu bigo bicumbikira abanyeshuri bakoherezwa mu bigo biga bataha kandi kure, Kabatesi avuga ko atari byo kuko umunyeshuri wiga ataha yiga mu Murenge w’iwabo gusa, cyangwa mu wo begeranye bitewe n’urugendo asabwa gukora.

Nta kosa ryabaye mu gushyira abanyeshuri mu myanya n’ibogo boherejweho
Nzeyimana avuga ko uburyo bw’ikoranabuhanga bwo kohereza abanyeshuri mu bigo no kubashyira mu myanya nta kosa na rimwe ryabayemo, ahubwo byakozwe neza ugereranyije n’uko mbere byagendaga, ku buryo ntawe bikwiye gutera imungenge.

Agira ati, “Nta kosa ryabeyho ahubwo ubu twabikoze neza kurusha mbere, tuzanakomeza kubikora neza uko tugenda twinjira neza muri sisiteme, kuko uko byagendaga mbere twarabivuguruye, kuba abakosora baramaze igihe gito ni ukugira ngo twihutishe gahunda yacu n’ingengabihe twihaye ngo abana bige igihe kirekire, bitandukanye n’abitwaza ko twakoreye ku gitutu”.

Avuga ko n’abari gukosora ibizamni by’abasoza amashuri yisumbuye biri kugenda neza, kandi ko abantu bakwiye gutandukanya ibintu bibiri ari byo amahitamo y’abana n’amahitamo y’ababyeyi babo.

Kabatesi agita ati, “Umwana wasabye ahantu ntahoherezwe ntabwo yabyishimira, kimwe n’uko uwahawe ahagendanye n’amahitamo ye bimushimishije, umwaka ushize hari abajuriye bagera ku bihumbi 35 ubu hari ibihumbi 40 ariko mu banyeshuri ubihumbi 200 bakoze ibizamini uyu mwaka nta gitangaje hajuriye ibihumbi 40, uwasanga twaramurenganyije yaza tukanabimwereka”.

Umunyeshuri wabonye zeru nyinshi atsinda ate?

Mu bibazo Abanyrwanda bagaragaje bibangamye mu kumenya amanota fatizo yo gutsinda n’ayo umunyeshuri yagize, harimo abagaragaje ko byaba byiza amanota agaruwe ku ijanisha kuko ibijyanye n’amagarade biteye urujijo.

Bavuga ko umunyeshuri wagize amanota 30 bandikaho ko yujuje, nyamara aba atari byo, ari naho hava urujijo rwo kuvunga ngo umwana wanjye yarujuje none bamwimye ikigo yasabye, kandi nyamara ngo burya aba atujuje, kimwe n’uwabonye zeru ngo nawe ntabwo ari zeru nyayo.

Kabatesi avuga ko kuri iyo ngingo ngo abarebera uburezi nibo bakomeza kuganira uko amanota yajya atangazwa, kuko benshi bifuza ko yasubizwa ku ijanisha risanzwe, gusa ngo n’uburyo bukoreshwa ntacyo butwaye kuko bukoreshwa no mu bihugu bya EAC.

Agira ati, “Ibyo byazarebwaho n’izindi nzego tukicara tukareba ibyanyura benshi gusa n’ubwo buryo ntacyo bwari butwaye, kuko biriya umwana wabonye zeru ntabwo aba ari zeru nyayo hari amanota aba afite makeya, uwabonye 30 nawe ntabwo bivuze ko yujuje 100%”.

Kabatesi avuga ko abavuga ko habayeho kurenganya abiga mu mashuri yigenga atari byo kuko, yonyine yihariye imyanya ingana na 60% by’ibigo bicumbikira abanyeshuri, amashuri ya Leta asanzwe acumbikira abanyeshuri n’aho biga bataha agasigarana gusa 40%.

MENYA UMWANDITSI

Ephrem Murindabigwi

Umunyamakuru

@ murieph

Reba inkuru zose nanditse ( 1595 )