Uyu mugore wabyariye ku kigo nderabuzima cya Kinoni mu karere ka Burera, aza koherezwa ku bitaro bya Ruhengeri kubera ko yari yabyaye abana batagejeje igihe cyo kuvuka, cyakora ngo bose uko ari batatu yababyaye neza.

Uyu mugore, wari usanzwe ufite abana bane barimo babiri yabyaye ari impanga, avuga ko amaze imyaka itanu apfakaye, bityo ngo ntabwo iyi nda ivutse mo batatu yigeze ayiteganya ahubwo ni ibibazo yahuye nabyo.

Ati : «Ntabwo iyi nda nigeze nyitegura kuko nayitwise biturutse ku gufatwa ku ngufu. Nari mvuye mu kiraka, abagabo babiri bamfata ku ngufu, ariko nanirwa kubamenya ngo mbe nabasha kubarega».

Aho arwaje abana be. Ngo yahohotewe ku mupaka muri Uganda avuye gupasaga yo.

Bitewe n’uko uyu mugore asanzwe adafite amikoro ahagije, ndetse akaba atanafite umugabo wo kumufasha kubarera, biragaragara ko abana barindwi atazoroherwa kubarera, maze umuntu akaba yakwibaza niba hari icyo ibitaro byakora ngo atazabakurikiza.

Dr Ndekezi Deogratias, umuyobozi w’ibitaro bya Ruhengeri, avuga ko kugeza ubu umubyeyi n’abana bameze neza, kuburyo igihe nikigera bazasezererwa bagasubira mu rugo. Gusa ngo k’ubufatanye n’ikigo nderabuzima azaganirizwa ku kuboneza urubyaro.

Ati : « Ku bufatanye n’ikigo nderabuzima cya Kinoni cyamukurikiranye, uyu mugore azagaruka aganirizwe ku bijyanye no kuboneza urubyaro, kuko abana barindwi agize ni umuryango munini. Yongeye kubyara kubarera byarushaho kumukomerera».

Yongeraho ko ubu hakiri kare, ahubwo ko azabanza agasubira mu rugo iwe, maze akazabona kugaruka, ku bufatanye n’inzego z’ibanze n’abajyanama b’ubuzima, kugirango amenye akamaro ko kuboneza urubyaro.

Intara y’Amajyaruguru ikunze kugira abagore babyara abana benshi kuko mu mpera z’umwaka ushize hari uwabyaye abana bane. Cyakora ubuyobozi hamwe n’abaterankunga bagenera ubufasha iyi miryango, burimo kubabonera inka izakamirwa abana, kubakira abadafite inzu ndetse n’ibindi.

Jean Noel Mugabo