Nk’uko byemezwa n’abaturiye uyu muhanda, ngo bitewe n’amazi amaze iminsi aretse haruguru y’uyu muhanda, ngo yagiye yinjira mu gitaka, maze bukeye imodoka zisanga witse ku buryo zitashoboraga guhita.

Ildephonse Ntuyenabo utuye mu murenge wa Muhoza aho uyu muhanda witse, yagize ati: “Nta handi imodoka zijyana mazutu kuri Mukungwa zaca. Twari dufite ubwoba ko umuriro ushobora kubura ahantu hatandukanye mu gihugu”.

Ku bufatanye n’umuganda w’abaturage, EWSA ndetse n’ubuyobozi bw’akarere, hihutiwe kuzana itaka ndetse n’amabuye kugirango imodoka zibashe gutambuka.

Roger Hasengayire, umwe mu bari gukoresha uyu muhanda ati: “Tumaze gushyiramo amabuye ndetse n’itaka none imodoka zibashije gutambuka. Turakomeza kugeza ubwo tubonako umuhanda ukomeye ku buryo utateza ibindi bibazo”.

Bamwe mu baturiye uyu muhanda, bavuga ko uburyo wacitse, bugaragaza ko itaka ryonyine ndetse n’amabuye bitakemura ikibazo ku buryo burambye, cyane ko amazi yuzuye ruguru y’umuhanda agihari.

Umunyamabanga nshingwabikorwa w’umurenge wa Muhoza, Manzi Claude, avuga ko iki kibazo kimaze icyumweru n’igice gitangiye kugaragara cyakora ngo mu gitondo cyo kuri uyu munsi nibwo cyabujije imodoka kugenda.

Avuga kandi ko ibyakozwe ari uburyo bwo gukemura ikibazo mu buryo bwa vuba kuko hari gahunda zaganiriweho n’ubuyobozi bw’akarere bugamije gukemura ikibazo ku buryo burambye.

Ati: “Turateganya kubaka ikiraro, ku buryo amazi azajya ahita agakomereza mu mugezi wa Mpenge uherereye hepfo y’uyu muhanda, cyane ko uduhuza n’umurenge wa Rwaza, Remera, Gacaca, Gashaki ndetse n’urugomero rwa Mukungwa”.

Urugomero rwa Mukungwa rutanga amashanyarazi mu bice byinshi by’intara y’Amajyaruguru ndetse n’iby’Umujyi wa Kigali.

Jean Noel Mugabo