Ababyeyi bafite abana bari mu mirire mibi batangaje ko izi nka bahawe, zigiye kubafasha kuvana abana babo muri icyo kibazo, ndetse zikanabafasha kubona ifumbire bagahinga bakeza bakihaza mu biribwa.

Niyibizi Patrick ni umwe mu bahawe inka, avuga ko iye azayifata neza ikamuha amata ndetse n’ifumbire.

Ati “Turashima ubuyobozi bwadutekereje bukatugabira izi nka, bizadufasha nk’imiryango binadufashirize abana bacu bakure neza”.

Umushumba mukuru w’itorero ADEPER mu Rwanda, Pasiteri Isae Ndayizeye, avuga ko ibi bikorwa babyitezeho guteza imbere imibereho myiza y’abaturage.

Ati “Gutanga inka no gutangiza igikoni cy’itorero, byose biraduha ibisubizo byo kurwanya imirire mibi kandi ni yo ntego yacu yo gufasha ababyeyi bafite ikibazo cy’abana babo kubona uburyo bwo kugikemura babaha amata ndetse bakabasha no guhurira muri icyo gikoni cy’itorero, bakiga gutegura ifunguro rikungahaye ku ntungamubiri”.

Pasiteri Ndayizeye avuga ko ari gahunda ya Girinka yatangijwe n’Umukuru w’Igihugu, nabo bakaba barimo bashyira mu bikorwa ibyo ubuyobozi bubasaba.

Guverineri w’Intara y’Amajyarugu, Nyirarugero Dancile, ashima uruhare rw’abafatanyabikorwa ariko asaba n’abagenerwabikorwa kwita kuri izo nka, kugira ngo zibahe umukamo ndetse zinabafashe kubona umusasruro mwinshi, bakesha ifumbire bazaba bahawe n’izo nka.

Ati “Abaturage bahawe izi nka turabasaba ko bazifata neza, ku buryo zizabaha umukamo ushimishije.”

Iki gikorwa cyakozwe n’Itorero ADEPR mu Rwanda ku bufatanye n’Ubuyobozi bw’Akarere ka Musanze, inka zatanzwe ngo zifite agaciro ka Miliyoni zisaga 15Frw.