Mu mpera z’umwaka wa 2011 ubutaka bungana na hegitari imwe bwo mu mudugudu wa Kibingo, burimo n’ubwa Akimanizanye bwatangiye kurigita. Ibi byatumye we kimwe n’indi miryango 15 bimurirwa mu isambu y’abaturanyi itaragize ikibazo, cyakora ngo kugeza ubu baracyafitanye ibibazo n’ababatuje.

Agira ati: “Uwantuje yarambwiye ngo arashaka guhinga isambu ye nimuguranire, kandi iyo sambu ariyo mpingamo. Nonese ubwo nabaho nte hamwe n’abana banjye?”

Ubuyobozi bwemeye gushumbusha abatanze ubutaka cyakora ngo kugeza ubu nta ngurane iraboneka. Ibi rero ngo bituma nta kindi gice yahabwa n’uwamutuje kugirango abashe kubaka neza igikoni ndetse n’umusarani.

Ati: “Mperutse kujya guca inshuro ngarutse barambwira ko abatware bavuze ngo umusarani uri mu nzu, ngo ntabwo bishoboka ko nawutinda. Ese ko ariyo sambu mbonye, nzajya njya gukubitanira n’umuvandimwe mu musarani we? Ubwo narawutinze ndavuga nti bizabe uko byakabaye”.

Nubwo Akimanizanye yabashije kumvikana n’uwamuguraniye, akamuha ahari inzu ye, ngo na n’ubu ntabwo barisobanura ku bijyanye n’umuhanda ugana kuri iyo sambu yatanze.

Akimanimpaye avuga ko akeneye ubufasha, kuko abana na virusi itera SIDA, bigatuma akunda kurwaragurika, bityo ngo adahawe ubufasha ubuzima bwe bushobora kurushaho kugenda nabi.
Ati: “Hatagizwe igikorwa, ubuzima bwanjye bushobora kurushaho kuba bubi kuko rwose ndashonje”.

Mu rwego rwo kwihanganisha abafite ubutaka burigita, bemewe amafaranga ibihumbi 300 igihe ubutaka bwabo bwakwangirika burundu, cyakora ntibarayahabwa kuko ngo ubutaka bwabo butangiritse ku buryo butabyazwa umusaruro.

Kuri iki kibazo, akarere ka Musanze kavuga ko kakoze iby’ibanze, kagasaba abaturanyi kubaha aho bubaka inzu, kagatanga n’amabati ngo bongere bubake.

Jean Noel Mugabo