Aba banyabukorikori biganjemo ababora imitako, amashusho y’ingagi, inkoni, uduseke, n’ibindi, bavuga ko umunsi wo kwita izina utuma abagura ibyo bakora baba benshi cyane.

Hakizimana Augustin, umunyabugeni ushushanya imitako yo gutaka akoresheje amarangi, avuga ko yongereye imbaraga mu mirimo ye, bitewe n’uko ashaka ko ibyo akora birushaho kumenyekana.

Ati: “Kwita izina bizatuma ama tableau dukora amenyekana hose, kuko hazaba haje abantu baturuka mu bice byinshi by’isi, ndetse no kugurisha tuzagurisha”.

Uyu munyabugeni ufite umwihariko wo gukorana n’abana bato, abatoza mu bijyanye no gushushanya, avuga ko aya azaba ari amahirwe ku bana bato bakorana, kuko bashobora kuzahabonera amahirwe yo kubona amasomo mu bugeni bakaba barushaho kunoza uyu murimo.

Ati: “nk’iyi tableau yakozwe n’umwana wiga mu mwaka wa gatatu w’amashuri abanza. N’ubwo itarimo ubuhanga buhambaye, ariko biragaragaza ko uyu mwana yifitemo impano yamugirira akamaro ndetse n’igihugu aramutse afashijwe”.

Abagore bakorera mu murenge wa Kinigi ibijyanye no kubona uduseke, bo baravuga ko umunsi wo kwita izina uzabasaba umusaruro mwinshi, bityo bakaba barongereye ku buryo budasubirwaho amasaha yo gukora.

Mukaneza Francine, umwe mu baboha uduseke, yagize ati: “Ubu saa kumi n’imwe turaba twari twatangiye kuboha, kugirango uriya munsi uzagere dufite ibiseke byinshi, tutazabura ibyo tugurisha kandi abaguzi babonetse”.

Igikorwa cyo kwita izina abana b’ingagi 12 kizaba ku nshuro ya cyenda, tariki 22/06/2013, aho kizabanzirizwa n’ibikorwa bitandukanye birimo urugendo rwiswe caravan tour, aho abazitabira bazasura ibikorwa bitandukanye nyarugendo, igitaramo n’ibindi.

Jean Noel Mugabo