Aba bamotari bavuga ko bishyura imisoro ya parikingi kandi nta hantu hazwi beretswe bajya bahagarara, ndetse n’aho bashyize ibyapa bya parikingi bikaba bitoroshye kuhahagarara, nk’uko Nsengiyumva David, uhagarariye abamotari mu Murenge wa Mukarange abivuga.

Ati “Mu Murenge wa Mukarange bashyizeho amahoro ya parikingi kandi nta hantu tuzigira mu buryo buzwi ku buryo wamenya ngo ahantu runaka ni parikingi yawe. N’aho bashyize ibyapa ni ahantu utabona uko uparika, ntabwo hari ibiraro, ntiwabona aho usohokera cyangwa aho winjirira”.

Abamotari bakorera muri uwo murenge w’Umujyi wa Kayonza bavuga ko icyo kibazo bakigejeje ku nzego z’ubuyobozi ariko ngo n’ubwo hashize igihe bakigaragaza nta gisubizo barahabwa.

Umuyobozi wabo avuga ko bibaye byiza bahabwa ikibanza mu kigo abagenzi bategeramo imodoka (Garre) cya Kayonza, kuko ngo bigeze kwemererwa kujya bayihagararamo ariko nyuma bakaza kuhirukanwa.

Kuba abo bamotari batagira ahantu bahagarara bategereje abagenzi hameze neza ngo bibangamira akazi ka bo, bakavuga ko rimwe na rimwe bishobora no guteza impanuka kuko hari ubwo usanga bamwe babyigana n’imodoka n’abantu batambuka mu muhanda kandi byitwa ko bari muri parikingi.

Mu mpera z’umwaka ushize abamotari bagejeje iki kibazo ku buyobozi bw’Akarere Kayonza ubwo bari mu nama n’itsinda ry’abasenateri bo muri komisiyo y’ububanyi n’amahanga, ubutwererane n’umutekano.

Icyo gihe umuyobozi w’Akarere ka Kayonza yijeje abo bamotari ko ubuyobozi bw’akarere buzaganira na polisi kugira ngo icyo kibazo gishakirwe umuti, ariko kugeza n’ubu ngo nta gisubizo barahabwa ku busabe bwa bo.

Cyprien M. Ngendahimana