Inka z’ubwiyunge.

Imiryango yahawe inka ni iy’abacitse ku icumu rya Jenoside yakorewe Abatutsi mu 1994 n’iy’ababiciye nyuma yo guhugurwa ku isanamitima n’ubwiyunge, aho imiryango ibiri yagiye ihabwa inka imwe yiswe inka y’ubwiyunge.

Abigishijwe bahanye impano z’urwibutso ry’ibyo bagezeho.

Mbonyingabo Christophe uyobora umuryango w’abakristu wita ku isanamitima (CARSA) watanze izo nka mu magambo ahinnye y’icyongereza, avuga ko gahunda batangije y’inka y’ubwiyunge itagamije kugororera abakoze ibyaha.

Yagize ati “Hari abibaza ukuntu abantu bakoze Jenoside bakamara abantu none tukaba tubaha inka, si ukubagororera ni uko tuzi ko umuntu adashobora gukora ikibi gusa”.

Mbonyingabo avuga ko inka y’ubwiyunge atari ingororano y’abakoze Jenoside.

Mbonyingabo avuga ko ibigabniro by’isanamitima bahaye abakoze Jenosdie n’imiryango bahemukiye byatanze umusaruro impande zombi zikabasha gukira ibikomere, kuko baba abakoze Jenosiede n’abacitse ku icumu ngo bari bafite ibikomere naho abandi bakagira ipfunwe ry’ibyo bakoze.

Mbonyingabo avuga ko guheranwa n’ibyo byose bidindiza iterambere akaba ari yo mpamvu bahisemo gushyiraho gahunda y’inka y’ubwiyunge izafasha gushimangira umubano mwiza imiryango bigishije imaze kugeraho, bakanywa amata kandi bakabasha kwiteza imbere.

Rwitsibuka (ibumoso) avuga ko yabonaga Jean Paul agaca hirya none ubu ngo babanye neza kubera inyigisho z’ubumwe n’ubwiyunge.

Imwe mu miryango yarokotse Jenoside yagabiwe inka ivuga ko bitari byoroshye kwigishwirizwa hamwe n’ababahemukiye ngo babane kugeza ubwo basigaye basangira.

Rwitsibuka Gaspard, wishe umuryango wo kwa Kamana Jean Paul ariko ubu bakaba babanye neza, agira ati “Nabonaga uyu mugabo Jean Paul nkumva umusatsi umvuye ku mutwe ariko natunguwe no kwigishwa hamwe na we arambabarira ubu icyo umwe afite aha undi”.

Mukayiranga, Umukozi wa Komisiyo y’Ubumwe n’Ubwiyunge muri Ntara y’Amajyepfo, avuga ko kwiyunga bigomba kugaragarira mu bikorwa aho kuba mu mvugo gusa.

Umukozi wa Komisiyo y’Igihugu y’Ubumwe n’Ubwiyunge mu Ntara y’Amajyepfo, Laurence Mukayiranga, avuga ko nubwo imiryango yigishijwe ikaba yemera ko ibanye neza bigomba kugaragarira mu bikorwa ntibibe mu magambo gusa kuko bigoye kwemeza niba koko imvugo yahamya ko umuntu yiyunze n’undi.

Umuryango CARSA uvuga ko inka y’ubwiyunge izakomeza kuba ikiraro gihuza abiyemeje kwiyunga kandi bikabera n’abandi bataratera intambwe urugero

Ephrem Murindabigwi