Ibi ni ibyatangajwe kuwa 09/10/2013, mu murenge wa Cyeza ho muri aka karere ka Muhanga ubwo bahaga inka abagore batishoboye bo muri uyu murenge.

Pasteri Clementine Nirere ni umuyobozi wungirije w’iri tsinda, atangaza ko bamaze kubona ko muri rusange imiryango iri gutandukana bahitamo gutangira inyigisho zo kongera kugarura icyanga muri izi ngo kugirango ababanye nabi bongere biyubake.

Ati: “iyo tubona abantu bari kwaka divorce [gatanya], iyo tubona imfubyi z’abakobwa cyangwa z’imiryango ziri hariye zidafite kivuganira, zidafite cyegeranye, twaravuze ngo turabona ingo zirangiye, ibyiza ni uko twakwegerana umuntu akongera agatekereza urugo rwe, umuntu akongera akaba mu nshingano ze”.

Nirere nk’umugore umaze imyaka irenga 25 yubatse urugo asanga ari mu nshingano za bombi haba ku mugabo no ku mugore kugirango urugo rukomere ariko hari benshi bajya bumva ko umugore ariwe ukwiye gushyiramo imbaraga kugirango urugo rusugire.

Pasteri Nirere asanga by’umwihariko umugore akwiye kugira uruhare runini kugirango urugo rudasenyuka. Ati: “mu busanzwe burya umugore ajya yoroha cyane, umugore ni nk’igi, iyo wiyoroheje rero ntawukujugunya aho ashatse ariko iyo wikomeje urameneka umuryango wose ukangirika, umugore nabigiramo uruhare cyane bizoroha ko umugabo agaruka niyo yaba afite umutwe ukomeye”.

Iyi gahunda yo kuremera imiryango ikennye mu murenge wa Cyeza yahuriranye n’igikorwa cyo kumurikira abaturage ibyagezweho umuwaka ushize ndetse no kubagaragariza ibyo umurenge uteganya gukora mu mwaka wa 2013-2014.

Izi nka 10 zatanzwe n’abagore b’ibyiringiro zifite agaciro ka miliyoni 4 zisaga. Uyu murenge wa Cyeza ,umaze gutanga inka 80 zirenga,uteganya kuremera imiryango itishoboye isaga 100.

Gerard GITOLI Mbabazi