Ntezirizaza uvuga ko yafunzwe imyaka 3.5 mu bihe bitandukanye azira urugomo, atanga ubuhamya avuga ko uretse kuba muri gereza umuntu ahagororerwa ubundi ntakiza gihari bityo utarayijyamo akaba agomba kuyirinda.

Kuri ubu, Ntezirizaza yemera kwerura akajya imbere y’abaturage agatanga ubuhamya, kuko uretse gufungirwa ibyaha yakoze avuga ko yanagurishije imitungo yari afite yose maze akayisesagura ubu akaba ari umukene, icyakora ubu yatangiye gukora udushinga duciriritse ngo arebe ko yakongera akiyubaka.

Ubwo inzego zitandukanye zasuraga umurenge wa Muhanda mu kwezi kw’imiyoborere myiza muri uyu mwaka wa 2014, umuyobozi wa polisi mu karere ka Ngororero, S/SP Yahaya Simugaya Freud, yafatiye ku rugero rw’uwo musore maze asaba abandi baturage kutemera kugwa mu byaha n’amakosa kuko bigira ingaruka.

S/SP Simugaya anasaba abaturage kudatuma Leta na polisi bakoresha imbaraga mu gukurikirana abanyabyaha kuko kwirinda aribo bifitiye akamaro.

Abaturage bo muri uwo murenge hamwe n’abayobozi bazi Ntezirizaza nabo bemeza ko koko yari igihararumbo kuburyo n’abaturage bari basigaye bamutinya ariko ubu akaba aturanye nabo nta kibazo kandi atanga urugero rwo kwisubiraho.

Umuyobozi w’akarere ka Ngororero, Gedeon Ruboneza, avuga ko muri gahunda zitandukanye z’akarere, uwo musore zafashwa mu guteza imbere ibitekerezo bye byiza birimo imishinga yo kwiyubaka yatangiye ndetse akanayigaragariza ubuyobozi.

Ernest Kalinganire