Minisitiri w’ubucuruzi n’inganda, Francois Kanimba, yerekanye ko mu gihe muri 2020 Abanyarwanda bazaba bagera kuri miliyoni 13 hakwiye gutezwa imbere inganda nto n’izicirirtse, guteza imbere ishoramari, guteza imbere izamuka ry’imijyi no kugerageza guhuza ubumenyi bukenewe ku mirimo kugira ngo intego u Rwanda rufite ishobore kugerwaho.

U rwanda rufite intego ko 50% by’Abanyarwanda bazaba bafite imirimo idashingiye ku buhinzi muri 2020.

Ubushakashatsi bwakozwe muri 2010 bugaragaza ko imirimo yari imaze guhangwa idashingiye ku buhinzi yari miliyoni imwe n’ibihumbi 400.

Uretse ikibazo cy’ubumenyi n’ingufu z’amashanyarazi, hagaragajwe ko amabanki yaka ingwate iyo agiye gutanga inguzanyo ndetse n’abantu bakora ibikorwa bimwe aho kwiga imyuga ari imbogamizi mu kwihangira imirimo bikaba bigomba kwitabwaho.

Perezida Kagame ukomeje kuyobora uyu mwiherero yashimangiye ko impamvu ishoramari ritiyongera mu Rwanda bikomoka ku kutongera ubumenyi bw’Abanyarwanda no kutongera ingufu z’amashanyarazi.

Yabisobanuye muri aya magambo: “ntabwo abashoramari bazaza gukorera mu mwijima, bazaza gukora iki? Nibaza bizabasaba kwizanira abantu bazabakorera kandi birahenze birakwiye ko amashanyarazi akwirakwizwa hanyuma n’Abanyarwanda bakongerwa ubumenyi ngiro”.

Umwiherero umaze iminsi itatu bikaba biteganyijwe ko usozwa kuri uyu wa kabiri tariki 06/03/2012.

Sylidio Sebuharara