Kuva saa tanu z’amanywa ku isaha y’i Kigali, ababyifuza baraganira na minisitiri Dr Pierre Damien Habumuremyi banyuze ku murongo we akoresha kuri Twitter @HabumuremyiP no ku buryo bwo kwinjira mu kiganiro bwa #AskPMRwanda, abakoresha twitter bita hashtag (soma hashitagu).

Iki kiganiro kiba gifunguye kuri buri muntu wese, kandi ngo ibibazo n’ibitekerezo bibazwa mu rurimi buri wese yifuza. Minisitiri Habumuremyi yatangiye bwa mbere kuganira n’ababyifuza kuwa 01/06/2012, icyo gihe akaba yaratangiraga kwakira ibibazo n’ibitekerezo ku isaha ya saa munani.

Icyo gihe minisitiri w’intebe w’u Rwanda yavugaga ko icyo kiganiro cyimara isaha imwe, ariko byaje kugaragara ko afata umwanya urenze isaha imwe agasubiza ibiba byabajijwe byose.

Uretse minisitiri Pierre Damien Habumuremyi, ba minisitiri Agnes Binagwaho ushinzwe ubuzima n’ubuvuzi na Kanimba Francois ushinzwe ubucuruzi n’inganda mu Rwanda nabo bajya bagira igihe cyihariye cyo kuganira n’ababishaka kuri Twitter.

Perezida w’u Rwanda Paul Kagame nawe ajya yakira ibitekerezo akanasubiza ibibazo binyuze ku rubuga rwa Twitter, ariko we ntabwo agira igihe cyihariye gihoraho cyo gukora icyi kiganiro.

Minisitiri Habumuremyi afite abantu basaga ibihumbi 13 bamukurikirana ku rubuga rwa Twitter, ariko imikorere ya Twitter yemerera abantu bose bari kuri Twitter babishaka gukurikirana ibivugwa no kubigiramo ijambo.

Ahishakiye Jean d’Amour