Iyi nama irimo kubera i Doha muri Qatar, izibanda ku ngingo zitandukanye, zirimo uburyo bwo gushora imari mu bantu, kurwanya ubukene no kubaka ubushobozi hashyirwa imbaraga muri siyansi, ikoranabuhanga no guhanga udushya.

Hazaganirwa kandi ku bijyanye no gushyigikira impinduka zigamije kubaka, nk’inzira igana iterambere, gutezimbere ubucuruzi mpuzamahanga no kwishyira hamwe kw’akarere.

Ikibazo gihangayikishije Isi muri iki gihe kijyanye n’imihindagurikire y’ikirere, COVID-19 no guhamagarira amahanga kurushaho gutahiriza umugozi umwe, byose biri mu byo iyo nama izagarukaho.

Mu minsi itanu iyi nama ya LDC5 izamara, abanyacyubahiro batandukanye hirya no hino ku Isi bazahurira hamwe n’abikorera, sosiyete sivile, abagize Inteko zishinga Amategeko n’urubyiruko, kugira ngo baganirire hamwe uburyo bwo gushyigikira no guteza imbere ibitekerezo bishya, kugaragaza imihigo mishya ikeneye gushyigikirwa, ndetse banagaragaze ubushake ku byo biyemeje, binyuze muri gahunda ya Doha Program of Action.

Minisitiri w’Intebe Dr Ngirente, ku ruhande rw’iyi nama kandi yabonanye n’abayobozi batandukanye barimo Dr. QU Dongyu, Umuyobozi mukuru w’Ishami rya Loni ryita ku Biribwa n’Ubuhinzi (FAO), Madamu Doreen Bogdan-Martin, Umunyamabanga Mukuru w’Umuryango Mpuzamahanga w’Itumanaho (ITU) na Bwana Andrew Mitchell, umunyamabanga wa Leta y’u Bwongereza ushinzwe iterambere na Afurika.