Mu Mirenge ya Ngororero na Kabaya hakozwe ikiganiro cyo kubaka kigenewe urubyiruko, hanatangwa ibikoresho by’ikoranabuhanga kuri koperative y’urubyiruko rwarokotse Jenoside.

Ku bufatanyije bwa StarTimes, Minisitiri Nsengimana yashyikirije urubyiruko rwibumbiye muri koperative Isamaza ikorera mu Murenge wa Ngororero ibikoresho by’ikoranabuhanga birimo mudasobwa ebyiri, televiziyo igezweho iri kumwe na dekoderi (decoder) bizabafasha kukomeza kuva mu bwigunge bakoresheje ikoranabuhanga.

Minisitiri w’Urubyiruko n’Ikoranabuhanga, Jean Philbert Nsengimana yasabye ubuyobozi bw’Umurenge, Akarere na FARG gukomeza gufasha uru rubyiruko kwiyubaka mu bitaragenda neza mu bworozi bwabo.

Iri koranabuhanga yabasabye kuribyaza umusaruro kuko rizafasha n’abaturage bose gutembera batavuye aho bari, yagize ati “Ibi bikoresho iyo biri hamwe bitanga icyumba mpahabwenge, ni mwebwe muzaba itara kuri aba baturage bose ba Ngororero.”

Kwizera Jean Pierre ukuriye koperative Isamaza yashimye cyane Minisiteri yabibutse kandi nabo nka koperative bagiye gutangira urugamba rw’iterambere ku buryo burushijeho.

Yagize ati “izi mudasobwa zizadufasha cyane mu gukoresha ikorababuhanga twari dusanganywe intego yo kugabanya ubushomeri mu barangije twongera ibindi bikorwa nko gushyiraho inzu y’icapiro n’ikoranabuhanga, iki ni igikorwa cy’urukundo, intangarugero ubu turi guseka nk’uko bigaragara inyuma ariko no ku mutima byaturenze.”

Nk’uko uhagarariye Isamaza yakomeje abivuga ngo mu biruhuko iyo abanyeshuri baje ari bose bagira igikorwa rimwe mu cyumweru cyo gufasha abatishoboye, nko kubakira abakecuru batishoboye no guha umusanzu bamwe mu basigaye ari nyakamwe.

Koperative Isamaza igizwe n’abanyamuryango 48 yatangiriye ku gishoro cya cy’amafaranga ibihumbi 30 borora ihene 20 bavuguruye inzu bashaka korororeramo ayo matungo bakaba bafite n’agasozi k’ubwatsi.

Nyuma yo guha impano koperative Isamaza, Minisitiri yerekeje mu Murenge wa Kabaya aho yaganiriye n’urubyiruko rwinshi n’abayobozi bari bitabiriye uyu muhango wo gufungura ‘Youth Connect Month’ ahakomereje ikiganiro mu nsanganyamatsiko igira iti: “gihango cy’urungano” mu cyongereza “a Promise of a Generation”.

Minisitiri yavuze ko igikorwa cyo kubaka Umunyarwanda mushya no kuganira ku mateka yacu ari igikorwa gishyashya mu kubaka urubyiruko rufite icyerekezo kizima, yasabye urubyiruko guharanira kurangwa n’umuco wo gukunda igihugu, maze asaba abari aho bose guhitamo amagambo icumi y’ibyiza byaranga Abaturage ba Ngororero.

Bahitamo ibi bikurikira bagira bati: “Turashaka kubaka igihugu kitarangwamo inzara; U Rwanda rwifitiye icyizere kandi rurangwa n’Abanyarwanda bafitanye icyizere; U Rwanda rutarangwamo ubugome kamere; U Rwanda ruzira ihohoterwa iryo ari ryo ryose; U Rwanda rutarangwamo amacakubiri; U Rwanda rutarangwamo ingengabitekerezo ya Jenoside; U Rwanda rutarangwa n’Ubujiji; U Rwanda rurangwa no kwigira; U Rwanda rufite ibiganza bikora ibyiza gusa (Amaboko mahire); U Rwanda rufite umutekano.”

Minisitiri yavuze ko muri buri jambo havamo ibikorwa by’amakoperative, amakipe meza akina umupira w’amaguru, ibikorwa by’ubucuruzi, guhanga udushya, ati: “Rubyiruko ntimugende ngo mwicare mutuze ahubwo amategeko icumi mwivugiye mwenyine mugende muyashyire mu bikorwa”.

Ukwezi k’Urubyiruko kwatangiye kuzarangira tariki 31 Gicurasi 2013 aho urubyiruko rw’igihugu ruzakora ibikorwa bitandukanye birimo ibyo kwiteza imbere n’ibyo gufasha abaturage.

Iyi nkuru twayohererejwe na Migisha Magnifique ushinzwe itangazamakuru muri Minisiteri y’urubyiruko n’Ikoranabuhanga