"Intandaro y’aya makimbirane usubiye inyuma, mbere na mbere akomeza gutizwa umurindi n’umutwe witwara gisirikare w’abajenosideri wa FDLR, nubwo uzwiho ibikorwa by’ubwicanyi bushingiye ku moko, kwinjiza abana mu gisirikare, no guhungabanya umutekano mu Rwanda no muri RDC, birababaje kubona imwe mu miryango mpuzamahanga ikomeza kwirengagiza nkana ko utabaho."

Ni ibyagarutsweho na Nduhungirehe ubwo yari mu nama y’Akanama ka UN gashinzwe amahoro ku Isi, yigaga ku bibazo byo muri Repubulika Iharanira Demukarasi ya Congo.

Minisitiri Nduhungirehe yavuze ko vuba aha ifatwa rya bamwe mu bari bagize FDLR barimo n’umuyobozi mukuru wayo, bagashyikirizwa u Rwanda byerekanye ibimenyetso simusiga uburyo guverinoma ya DRC yinjije abarwanyi ba FDLR mu Ngabo z’Igihugu.

Yagize ati: "Kinshasa yabahaye intwaro, ibikoresho, n’urubuga rwo gukomeza ingengabitekerezo yabo ya jenoside."

Minisitiri Nduhungirehe yakomoje no ku gutotezwa bikorerwa abavuga ururimi rw’Ikinyarwanda muri Congo, cyane cyane abo mu bwoko bw’Abatutsi bitewe n’ingaruka z’abakoloni. Ibi bikaba bikorerwa abaturage bo mu Ntara ya Kivu y’Amajyepfo na Ituri.

Ati: "Mu ngaruka z’ivangura, ihohoterwa no kurimbura amoko muri RDC, harimo ibihumbi n’ibihumbi by’impunzi ziri mu Rwanda, Uganda ndetse no mu bindi bihugu byo mu Karere kacu, bamaze igihe kinini mu nkambi z’impunzi, bamaze imyaka myinshi barabuze uko babasha gusubira mu byabo."

Yakomeje agira ati: "Ukurikije uko ibintu bimeze, u Rwanda rurifuzwaho iki? Kuki u Rwanda rukomeje kwibasirwa cyane? Ntabwo bisobanutse. Ikigaragara nk’u Rwanda, ni uko ingamba z’ubwirinzi twashyizeho zizagumaho, kugeza igihe hazaba hari urwego rwizewe rw’umutekano mu gihe kirekire, ku mupaka na DRC."

Minisitiri Nduhungirehe yakomoje no ku mikorere y’Ingabo za MONUSCO zimaze imyaka irenga 25 muri DRC nyamara zarananiwe gushyira mu bikorwa inshingano zazjyanye muri icyo Gihugu zo kurandura imitwe yose yitwaje intwaro, harimo n’umutwe wa FDLR w’abasize bakoze Jenoside mu Rwanda, umaze imyaka irenga 30 mu Burasirazuba bwa DRC.

Yagize ati: "Ntidushobora kwizera amahoro niba intandaro y’ibi bibazo idakemutse. Mu byukuri, guhera mu 2003, iyi nama yongeye kwibutsa ko ari ngombwa gukemura ikibazo cya FDLR binyuze mu myanzuro irenga 20. Nyamara, nyuma y’ama miliyari y’amadorari yakoreshejwe mu butumwa bwa Loni bwo kubungabunga amahoro buhenze cyane mu mateka, kugera ku bisubizo bifatika biracyagoye."

Nubwo bimeze bityo ariko, Minisitiri Nduhungirehe yavuze ko u Rwanda rukomeje kwizera ko MONUSCO ishobora guhindura imikorere kandi ikagira uruhare runini mu gukemura ibyo bibazo, mu gihe yaba yubahirije inshingano zayo zo kurengera abaturage, kwita ku burenganzira bwa muntu ndetse ikaba yanatanga ubufasha mu nzira ziganisha ku mahoro arambye zihuriweho n’umuryango wa EAC na SADC.

Minisitiri Nduhungirehe yavuze ko kugeza ubu mu kwishakamo ibisubizo, ubu hari imbaraga zihuriweho hagati ya EAC na SADC, nyuma y’uko hafashwe icyemezo cyo guhuza ibiganiro bya Luanda na Nairobi. Ati: "Ibi biganiro bizayoborwa n’itsinda ryagutse ry’abahuza batanu baturutse muri Afurika yose, bayobowe n’Umuyobozi wa Afurika Yunze Ubumwe."

Yavuze ko igisubizo kirambye cya politiki ndetse n’umutekano w’u Rwanda mu buryo burambye, bizarushaho kugira uruhare mu bikorwa by’ingenzi kandi byihutirwa byo guteza imbere Igihugu no guhuza Akarere ndetse n’abaturanyi muri rusange.

Minisitiri Amb. Olivier Nduhungirehe yavuze ko u Rwanda kuva kera rwifuzaga gukemura mu buryo burambye ibibazo bya politiki n’umutekano mu Karere. Ati: "Ni muri urwo rwego, twiyemeje gukorana n’impande zose kugira ngo twubahirize ibyo twiyemeje, cyane cyane gahunda y’inama ihuriweho na EAC-SADC, n’ibindi bikorwa byuzuzanya."

"Mu minsi micye, tuzibuka Jenoside yakorewe Abatutsi mu 1994, nk’ikintu gikwiye guhora cyibutsa akamaro ko kurinda abaturage bose urwango, urugomo n’amacakubiri aho baba baherereye hose. Ubutumwa bw’u Rwanda uyu munsi burumvikana. Turashaka igisubizo kirambye cya politiki, dushyigikiye ibiganiro, kandi turashaka gufatanya mu guhosha amakimbirane no guteza imbere Akarere kacu."