Mu gihe akarere ka Karongi kasubiye inyumaho imyanya icumi kakava ku mwanya wa mbere kakajya ku wa cumi n’umuwe, Minisitiri w’Ubutegetsi bw’Igihugu, Francis Kaboneka, yabanenze abasaba kwikubita agashyi kugira ngo bongere kugaruka mu myanya y’imbere.

Yagize ati “Imbaraga zatumye muba aba mbere kuki zidakomeza kugira ngo mube nibura aba gatatu.”

Aha Minisitiri Kaboneka yasabye inzego zose z’ubuyobozi mu Karere ka Karongi kubitekerezaho bagakora ibyo biyemeje kuko igihugu ngo kititeguye gushyigikira umuntu uwo ari we wese usubira inyuma. Yagize ati “Utiteguye kujya mbere ngo atere intambwe ijya imbere mbibabwije ukuri ahangaha nakuremo ake.”

Minisitiri Kaboneka yababwiye kandi ko iyo umuyobozi ateye intamwe isubira inyuma abaturage bo batera ijana basubira inyuma, bityo abayobozi bakuru b’igihugu ngo bakaba batiteguye kwemera ko abaturage b’u Rwanda basubira inyuma.

Yagize ati “Nimumanuke mwegere abaturage! Nimumanuke mubane n’abaturage ni zo nshingano mufite.” Aha akaba yihanangirije cyane abayobozi bigira ibihangange abasaba kwicisha bugufi bakegera abo bayobora.

Minisitiri w’Ubutegetsi bw’Igihugu yakomeje asaba by’umwihariko abagize Komite z’Imidugudu kujya begera abaturage urugo ku rundi, umunsi ku wundi bakabashishikariza gahunda za Leta ndetse no gutekereza ibikorwa byabateza imbere bishingiye ku mihigo y’ingo ndetse abashishikariza kuba intangarugero.

Yagize ati “Ntuzajya gushishikariza umuturage gutanga mutuelle nawe utarayitanga cyangwa ngo ubashishikarize kubana neza urara urwana n’umugore wawe cyangwa umugabo wawe.”

Bamwe mu bayobozi b’inzego z’ibanze bagaragarije Minisitiri Kaboneka ko Karongi y’ubu ari impinduramatwara ugereranyije na Karongi ya mbere ya Jenoside aho ngo abaturage basuhukaga kubera inzara abandi ugasanga bararenzwe n’umwanda.

Serugendo Zephiline, umwe mu bayobozi b’imidugudu, yagize ati “Utubwirire Perezida wa Repubulika ko rwose Karongi turi Inkingi z’Impinduramatware kuko uko Karongi yahoze yahindutse cyane ku buryo bugaragara.”

Abayobozi b’imidugudu bibanze ku bikorwa bihindura ubuzima bw’abaturage nka gahunda y’imirire myiza, gahunda y’ubwisungane mu kwivuza ndetse na gahunda y’ubworozi’ubuhinzi bwa kijyambere aho wasanganga bavuga ko abaturage hafi ya bose mu midugudu batuyemo ubu ngo bafite amatungo n’abatarayabona ngo binyuze mu miyoborere myiza akaba ari hafi kubageraho.

Inama Mpuzabikorwa y’Akarere ni inama iteganywa n’itegegeko iba rimwe mu mezi atandatu. Ihuza inzego zose z’ubuyobozi bw’ibanza mu Karere kuva ku bayobozi b’imidugudu kugera ku buyobozi bw’akarere.

Niyonzima Oswald