KT TV
Miliyoni 40 nizo zahawe abagororwa aturutse mu bikorwa bakoze bikinjiza amafaranga
Mu mwaka wa 2011-2012 Leta yungukiye urwego rushinzwe amagereza (RCS) amafaranga miliyoni 40 nka 10% baba bemerewe kubera ibikorwa bibyara inyungu abagororwa bakoze bikinjiriza Leta amafaranga. RCS itangaza ko n’ay’uyu mwaka ari hafi kubageraho.
Ayo mafaranga yoherejwe mu magereza 13 ari mu gihugu, ariko akagabanywa bitewe n’uko buri gereza ari yo yinjije menshi, nk’uko byatangajwe na Anastase Nabahire ushinzwe Imari, Abakozi n’Ubutegetsi muri RCS mu kiganiro yagiranye n’abanyamakuru, kuri uyu wa Kabiri tariki 30/07/2013.
Yatangaje ko amafaranga yamaze kubageraho, bakaba bagitegereje ko n’ay’uyu mwaka azabohererezwa, nk’uko biteganywa n’itegeko.
Yagize ati: “Muri uyu mwaka ushize twubahirije uburenganzira bwabo 10% turayabagenera abashinzwe ibikorwa n’amafaranga barimo barafatanya kureba urwunguko rwabonetse muri uyu nguyu.
Mwabonye ko twarengeje n’ayo twari twihaye mu mihigo, nabwo tuzongera turebe ayo dushora, agenewe ibindi bikorwa noheho tukabagenera ayandi. Ni uburenganzira bugenwa n’itegeko tudashobora guca iruhande.”
Muri uyu mwaka RCS yinjije amafaranga agera kuri miliyari 1,4 ugereranyije na miliyari imwe bari bihaye mu mihigo. Paul Rwarakabije uyobora urwego rushinzwe amagereza (RCS) yatangaje ko nyuma yo kubaha iyo nyungu yabo banaboneraho kubafasha mu bindi bikorwa bifuza byakongera imibereho myiza yabo.
Yakomeje atangaza ko abagororwa barenga ibihumbi 54 bahawe inyigisho z’uburere mboneragihugu, hibandwa cyane cyane ku bumwe n’ubwiyunge bw’Abanyarwanda, uburenganzira bwa muntu no kurwanya ikoreshwa ry’ibiyobyabwenge.
Emmanuel N. Hitimana
Ibitekerezo ( 1 )
Ohereza igitekerezo
|
|
twebwe abacungagereza tujyana abagororwa mwiyo mirimo natwe itegeko rivuga ko natwe twemerewe 10% ariko kugezubu ntayo duhabwa,mutubarize ministre w’umutekano na paul Rwarakabije icyo babivugaho .ikindi nuko umucungagereza nta gahunda ya leta imugeraho nkafashwe kandi bigaragara ko nta mikoro umushahara nintica ntikize.