Menya imvano y’amasezerano y’u Rwanda na Qatar ku kibuga cy’indege cy’i Bugesera

Mu museso wa tariki ya 09 kanama 2017, imihanda yose yerekeza mu Karere ka Bugesera yari yuzuye urujya n’uruza rw’ibinyabiziga.

Imodoka z’abanyacyubahiro zanyuranagaho umunota ku wundi zerekeza mu Bugesera. Wari umunsi udasanzwe.

Perezida wa Repubulika Paul Kagame wari umaze gutorerwa indi manda, yerekeje i Bugesera, gutangiza imirimo yo kubaka ikibuga cy’indege cy’i Bugesera.

Muri Nzeri, umwaka wari wabanje wa 2016, Leta y’u Rwanda yari yasinye amasezerano na Kompanyi yo muri Portugal yitwa ‘Mota Engil’, yo kubaka iki kibuga cy’indege, yari agizwe n’icyiciro cya mbere cyagombaga kuba gifite ubushobozi bwo kwakira abagenzi miliyoni 4.5 ku mwaka.

Perezida Kagame yatangije ku mugaragaro imirimo yo kubaka, kuva ubwo imashini nini zitangira akazi ko gusiza ikibuga.

Kubaka byari biteganyijwe mu byiciro bibiri, nk’uko byari mu masezerano ya Guverinoma y’u Rwanda na Kompanyi Mota Engil.

Icyiciro cya mbere cyagombaga gutwara miliyoni 418 z’amadolari ya Amerika, kandi kikaba cyaragombaga kuzura mu kwezi k’Ukuboza 2018.

Nyuma y’iki cyiciro, imirimo y’icyiciro cya kabiri ihwanye na miliyoni 400 z’amadolari ya Amerika, yagombaga na yo gutangira, bisobanuye ko ibyiciro byombi byagombaga gutwara miliyoni 818 z’amadolari ya Amerika.

Uburyo imirimo yo kubaka yakorwagamo vuba, byatangaga icyizere. Kigali Today yasuye ahakorerwaga imirimo yo kubaka iki kibuga, amezi 11 nyuma y’uko Perezida Kagame ayitangije ku mugaragaro, icyo gihe imirimo ikaba yari igeze kuri 14.8% nk’uko abari bayoboye iyo mirimo babitangaje.

Gahunda yo kongera gusura iki kibuga, yari iteganyijwe mu mezi umunani ashize, ariko amakuru yaje kugera kuri Kigali Today, ko imirimo yo kubaka iki gikorwa remezo kinini mu gihugu yari yarahagaze, mu gihe Leta y’u Rwanda yateganyaga kuvugurura uburyo bw’imyubakire y’iki kibuga kikazaba ari ikibuga kigezweho ku rwego rw’isi.

Ibi byamenyekaniye mu kiganiro Perezida Kagame yagiranye n’abanyamakuru nyuma y’Inama y’Igihugu y’Umushyikirano, tariki ya 04 Ukuboza 2018.

Kuva icyo gihe, amakuru kuri iki kibuga yari makeya, kugeza kuwa mbere tariki ya 09 Ukuboza 2019, ubwo hatangazwaga amakuru ko Guverinoma y’u Rwanda yasinyanye amasezerano na Kompanyi yo muri Qatar ikora ingendo zo mu kirere (Qatar Airways), yo kubaka ikibuga cy’indege cy’i Bugesera.

Guverinoma y’u Rwanda ivuga ko ayo masezerano akubiyemo ingingo eshatu, ari zo kubaka, gucunga no kwita ku kibuga.

Muri aya masezerano mashya, Qatar Airways yemeye gufata 60% by’iki kibuga bihwanye na miliyari 1.3 z’amadolari ya Amerika, arenze miliyoni 818 z’amadolari zari mu masezerano ya mbere na Mota Engil.

Mu kuvugurura imyubakire y’iki kibuga, mu cyiciro cya mbere ikibuga kizaba gifite ubushobozi bwo kwakira abagenzi miliyoni zirindwi ku mwaka (bikubye hafi kabiri ku bari bateganyijwe mbere), ndetse hakaba n’icyiciro cya kabiri kizarangira muri 2032, kikazasiga ikibuga gifite ubushobozi bwo kwakira abagenzi miliyoni 14 ku mwaka.

Nyuma yo gusinya ayo masezerano, Minisitiri w’Ibikorwa Remezo Amb. Claver Gatete yagiranye ikiganiro n’abanyamakuru, asobanura byinshi kuri aya masezerano hagati ya Leta y’u Rwanda na Qatar Airways.

Minisitiri Gatete yavuze ko “Mu magambo arambuye, ayo masezerano asobanuye ko ku bijyanye n’imigabane, u Rwanda ruzaba rufite 40%, mu gihe Qatar Airways izaba ifite 60%”.

Andi masezerano arebana no kubaka, Minisitiri Gatete yabwiye Kigali Today ati “U Rwanda rwagombye kwisubiza imigabane ingana na 75% Mota Engil yari yaraguze, kugira ngo rubashe kuba rufite 100% by’iki kibuga, mbere yo gusinya amasezerano na Qatar Airways”.

Ku masezerano ya gatatu, Minisitiri Gatete yabwiye abanyamakuru ko ayo akubiyemo ko Qatar Airways izajya isana ibyangiritse ku kibuga.

Minisitiri Gatete ati “Muri aya masezerano mashya, byose ni ukugira ngo tugire ikibuga cy’indege kigezweho ku isi”.

Abajijwe niba Mota Engil yarasezerewe muri uyu mushinga, Minisitiri Gatete yagize ati “Oya! Tuzakomeza gukorana na bo mu mirimo yo kubaka”.

Mu gihe icyiciro cya kabiri cyo kubaka iki kibuga biteganyijwe kizarangira muri 2032, Minisitiri Gatete ntiyigeze atangaza igihe icyiciro cya mbere cyazaba cyarangiriye.

Yirinze kandi kuvuga aho inkunga y’uruhare rwa Leta y’u Rwanda muri uyu mushinga yaturutse.

Kugura izindi ndege

Kur rundi ruhande, mu gihe Kompanyi y’u Rwanda ikora ingendo zo mu kirere (Rwandair) ikomeje kwagura ibice ikoreramo ingendo, Minisitiri Gatete avuga ko iyi Kompanyi yamaze gutumiza izindi ndege nini.

Ati “Twatumije indege nini”, ariko yirinze kuvuga umubare wazo. “Muzazibona niziza”.

Kugeza ubu, Rwandair ikorera ingendo mu byerekezo 28, ikaba kandi iteganya gutangiza n’izindi ngendo nko muri Leta zunze ubumwe za Amerika, Ethiopia, Mozambique na Angola.

MENYA UMWANDITSI

kigalitoday android app mobile

Ibitekerezo   ( 2 )

Wamwanditsi we ufite icyo upfa na BRALIRWA cg SCORE

Alias Murokore yanditse ku itariki ya: 12-12-2019  →  Musubize

Kbx birakwiye Kandi twishimiye umubyeyi wacu president wa repubulika udahwema kuduha ibyotwifuza

Ayirwanda jean pierre yanditse ku itariki ya: 11-12-2019  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka