KT TV
Menya ibisubizo by’abantu 655 bapimwe Covid-19 bari mu masengesho
Kuri iki Cyumweru tariki 3 Ukwakira 2021, Ikigo cy’igihugu cyita ku Buzima (RBC), cyapimye Covid-19 abantu 655 bari mu masengesho mu madini n’amatorero atandukanye yo mu Mujyi wa Kigali, abapimwe bose bakaba basanze ari bazima.
RBC ivuga ko bapimye abantu 143 muri Katedarali St Michel, bapima abantu 201 muri Zion Temple mu Gatenga, abantu 151 muri Restoration Church Kimisagara ndetse na EAR Remera hapimwe abantu 160, abo bose bakaba basanze nta n’umwe ufite ubwandu bwa Covid-19.
Icyo gikorwa cyo gupima abagiye mu masengesho, kije gikurikira icyaraye kibaye mu ijoro ryo ku wa Gatandatu tariki 2 Ukwakira 2021, cyo gupima Covid-19 abari mu tubari dutandukanye two mu Mujyi wa Kigali.
Mu tubari hapimwe abantu 672, muri abo bose nta n’umwe wagaragaweho ubwandu bwa Covid-19.
Iyo ni gahunda RBC yatangije mu rwego rwo kugenzura, ngo barebe ahahurira abantu benshi nko mu tubari, mu madini n’amatorero ndetse n’ahandi, niba nta bahaza bafite ubwandu bwa Covid-19 ngo babe bayikwirakwiza, mu gihe imibare y’abandura imaze kugabanuka. Iyo gahunda ngo ikazakomereza n’ahandi mu gihugu.
Ibitekerezo
Ohereza igitekerezo
|
|
