Ibi byatangarijwe mu kiganiro umushinjacyaha mukuru Richard Muhumuza yagiranye n’abanyamakuru kuwa 12/12/2013 ari hamwe n’itsinda ryihariye ryashyiriweho gukurikirana imari ya leta yanyerejwe.

Mu kubaza impamvu hamaze kugaruzwa amafaranga make ugereranyije n’ayo bavuga yarigishijwe, bwana Muhumuza yagize ati “Amafaranga ataragaruzwa ni menshi ariko impamvu nyamukuru ni uko amadosiye ayakurikirana yagejejwe mu nkiko ariko imanza zikaba zitaracibwa ngo zemeze abazishyuzwa n’umubare w’amafaranga.”

Muhumuza yavuze ariko ko nta rirarenga kuko igihe cyose inkiko zizaba zamaze guca imanza abanyereje ayo mafaranga bazasabwa kuyagarura mu isanduku ya leta kandi ngo bizakorwa nta gisibya.

Umushinjacyaha yavuze kandi ko usibye amafaranga yanyerejwe, ngo hari n’abakozi 41 bagaragaweho amakosa mu kazi arimo no gukoresha amafaranga nabi bagahombya leta ariko uru rwego rukavuga ko rwagejeje inyandiko zibasabira ibihano by’akazi n’amande mu biro bya Minisitiri w’intebe.

Ibyaha uru rwego rukurikirana bimaze kugaragara ni ibiboneka mu micungire mibi y’imari ya leta nko kunyuranya n’itegeko n’amabwiriza bigenga amasoko ya leta, gusonera no kunyereza imisoro mu buryo bunyuranyije n’amategeko, ubuhemu, gutangira ubusa ibya leta n’ubujura.

Itsinda rikurikirana imari ya leta ryashyizweho n’icyemezo cyo mu mwaka wa 2007. Ni itsinda rigizwe n’abashinjacyaha 19 rigamije gukurikirana imari ya leta.

Emmanuel. N. Hitimana