Mu kiganiro n’abanyamakuru, Anaclet kalibata, umuyobozi w’ikigo gishinzwe abinjira n’abasohoka mu Rwanda, yasobanuye ko laissez-passer nshya igurwa amafaranga ibihumbi 10 ku bantu barengeje imyaka 16 n’amafaranga 5000 ku bana kandi imara imyaka ibiri ahoi kuba umwe nk’uko byari bisanzwe.

Kalibata yakomeje asobanura ko ibyifuzo by’abagana ibiro bishinzwe abinjira n’abasohoka mu gihugu byagaragazaga ko laissez-passer yakoreshwaga itajyanye n’igihe ndetse idatwarika neza kuko wasangaga bayizinga ikangirika.

Kuba iyo laissez-passer yamaraga umwaka umwe byatumaga abantu bagahora bagaruka guhinduza buri mwaka kandi hanagendaga hagaragara ingero z’abantu bagerageza kuyigana kuko yari igipapuro gisanzwe.

Muri 2009, nibwo hatangiye umushinga wo guhindura imiterere ya laissez-passer yari iriho kugira ngo hakorwe Laissez-passer y’agatabo kandi ikoranye ikoranabuhanga ifite uburyo bwo kurinda umutekano wayo ikazajya imara imyaka ibiri.

Laissez-passer nshya

Uyitunze azajya ashobora kujya mu bihugu bitandatu aribyo u Burundi, Repuburika Iharanira Demokarasi ya Congo, Kenya, Tanzania, Uganda na Sudani y’Amajyepfo.

Amateka ya laissez-passer mu Rwanda

Impapuro zitanga uburenganzira bwo gusohoka no kwinjira mu gihugu zatangiye gukoreshwa ku bw’abakoloni u Rwanda rugifatanye n’u Burundi. Icyo gihe Abaturage bari batuye muri territoire ya Rwanda-Urundi bahabwaga icyangombwa cy’inzira bitaga Passport de Sortie cyaje guhinduka Laissez-passer. Uwabaga ayihawe yabaga yemerewe kujya muri Uganda, Tanganyika territory na Congo belge.

Passeport de sortie yakoreshwaga mu gihe cy’ubukoloni

Mu mwaka w’1963, hasohotse Iteka rya Minisitiri rigena inzandiko z’inzira zikoreshwa mu Rwanda. Ni nabwo hatangiye gutangwa urwandiko rw’inzira rusimbura Pasiporo ruzwi ku izina rya Laissez-passer.

Igitangira gutangwa uwayihawe yabaga yemerewe kugera mu bihugu bihana imbibi n’u Rwanda gusa, aribyo: Congo (Leopordville y’icyo gihe),Uganda, Burundi na Tanganyika (Tanzaniya y’ubu).

Laissez-passer ya mbere yatanzwe mu 1963

Mu w’1984 mu bihugu yageragamo haje kongerwamo igihugu cya Kenya. Iyi Laisser-passer yatangwaga n’Ibiro by’Abinjira n’Abasohoka, ndetse n’abaperefe nabo bagashobora kuyiha abaturage batuye muri Perefegitura bayobora.

Ihindurwa rya Laissez-passer rya mbere ryabaye mu w’1991, ihindurwaho ibintu bibiri by’ingenzi. Icya mbere imiterere yayo yarahindutse kuko yongerewe amapagi agirwa ane, icya kabiri igihe imara gishyirwa ku mwaka umwe, warangira uyifite agahindurirwa agahabwa indi nayo imara umwaka umwe.

Iyi Laissez-passer yari ifite amapaji make (ane gusa). Paji ya mbere yari yanditseho imyirondoro y’umuntu n’amwe mu mabwiriza agenda iyi Laissez-passer.

Laissez-passer yari iriho mbere y’uko haza inshya

Nta buryo bwo kurinda umutekano wayo yari ifite, ku buryo bashoboraga kuyigana. Yari urupapuro rusanzwe (A4) ku buryo rwangirikaga vuba.

Muri 2000 ubwo ibirango by’igihugu byahindukaga, hasohotse indi laissez-passer ariko ntaho yari itandukaniye n’iyayibanjirije uretse ko yari ifite ibirango bishya.

Emmanuel N. Hitimana