Minisitiri Dr Ngirente Edoaurd ni we washyize Ibuye ry’ifatizo ahagiye gukorerwa imirimo yo kwagura ibitaro bya Masaka aho bizahita bihindurirwa izina bikaba Ibitaro bya Kaminuza bya Kigali CHUK.

Ati “Uyu ni umwe mu mishinga yo kubaka ibitaro biri ku rwego rwo hejuru mu gushyira mu bikorwa icyerekezo u Rwanda rwihaye rwo kubaka igicumbi cy’ubukerarugendo bushingiye ku buvuzi”.

Minisitiri w’ubuzima Dr Sabin Nsanzimana avuga ko ibi bitaro bizuzura biri ku rwego rwo hejuru bikaba aribyo bizakomerezamo imirimo yo kwigisha abiga kuvura indwara zitandukanye kuko bizahuzwa n’ibitaro bikuru bya CHUK.

Minisitiri Dr Nsanzimana avuga ko igishushanyo mbonera kigaragaza ko bizaba bifite inyubako eshatu z’abarwayi zubatse mu buryo bw’amagorofa harimo izigeretse inshuro eshanu, bizaba bifite kandi inyubako zikorerwamo ubushakashatsi, izo kwigishirizamo n’izindi zizakorerwamo imirimo y’ubuvuzi itandukanye.

Ibi bitaro bigiye kwagurwa ku bufatanye n’igihugu cy’ubushinwa cyikaba ari nacyo cyari cyarubatse ibitaro byari bihasanzwe.

Ambasaderi w’ubushinwa mu Rwanda avuga ko igihugu cy’ubushinwa ibikorwa gikorera mu Rwanda ari mu rwego rwo kubahiriza amasezerano yashyizweho umukono n’abayobozi b’ibihugu byombi.

Ati “Kwagura ibi bitaro biri mu bizakomeza kwagura umubano w’u Rwanda n’Ubushinwa”.

Nibyuzura bizaba bifite ubushobozi bwo kwakira abarwayi 827, mu gihe CHUK ubu yakiraga abarwayi bagera kuri 400.