Ibi, Bamporiki yabitangarije mu karere ka Nyamasheke kuri uyu wa 24/09/2013 ubwo yaganiraga n’urubyiruko rwo muri aka karere kuri gahunda ya “Ndi Umunyarwanda” igamije kubohora imitima y’Abanyarwanda bishingiye ku bikomere batewe n’amateka mabi ya Jenoside yakorewe Abatutsi u Rwanda rwanyuzemo.

Mu buhamya yahaye uru rubyiruko, Bamporiki yagaragaje agahinda n’ipfunwe yagiye agira ryatewe no kubona n’amaso ye Jenoside yakorewe Abatutsi kandi ikozwe n’abo mu bwoko bw’abahutu (akomokamo) barimo n’abo mu muryango we; bityo ngo akaba yariyumvagamo ikimwaro cyo kuba ari umuhutu kuko jenoside yakozwe mu izina ry’abahutu bayikorera abatutsi.

Bamporiki kandi yagaragaje uburyo yaje kubohoka yumva ko ari Umunyarwanda nk’abandi kandi ko icyo yakora cyose n’uko atekereza ubungubu abikora nk’Umunyarwanda nta kindi yishingikirijeho bitewe n’uko yabohotse ku mutima.

Bamporiki yasabye urubyiruko rwa Nyamasheke ko ababa bakiboshywe n’ipfunwe batewe n’ababyeyi babo cyangwa abo mu miryango yabo bagize uruhare muri Jenoside, ko babohoka bakiyambura uwo mwambaro w’amoko ahubwo bakiyumva nk’Abanyarwanda baharanira kubaka igihugu bagikorera kugira ngo biteze imbere.

Bamporiki kandi yongeye kugaruka ku ijambo rikunze gukoreshwa na benshi ndetse n’ibitangazamakuru; aho bavuga ngo arashishikariza “Abahutu bose gusaba imbabazi Abatutsi”, maze agaragaza ko hari abakoresha izo mvugo bagamije izindi nyungu zabo kuko we ngo icyo asaba ari uko Abahutu bose bagize uruhare urwo ari rwo rwose muri Jenoside yakorewe Abatutsi bagomba gusaba imbabazi kugira ngo habeho ubwiyunge bwuzuye.

Ku rubyiruko, ngo aya ni amahirwe yo kubohoka ibyaba byakozwe n’ababyeyi cyangwa abo mu miryango yabo no kwitandukanya na byo, bakatura bakagaragaza ko batabishyigikiye maze bagasigara bumva ko buri wese ari Umunyarwanda kandi ko kuba Umunyarwanda ari cyo kimuhesha amahirwe yose mu gihugu cye kuruta kwishingikiriza ku kindi icyo ari cyo cyose nk’amoko.

Kugira ngo ibyo bigerweho, urubyiruko rurasabwa kwitandukanya n’ibitekerezo by’abantu bakuru baba barakoze Jenoside ndetse n’ababashyigikiye, rukiyakira, bityo rukabasha kubohoka ipfunwe; kandi rukagira n’uruhare mu gushishikariza ababa baragize uruhare muri Jenoside gusaba imbabazi mu rwego rwo kubaka ubwiyunge nyabwo mu Banyarwanda.

Bamporiki yagize ati “Dukwiriye gukorera u Rwanda nta kindi twishingikirijeho uretse kuba Abanyarwanda kandi ntushobora gutera imbere ukiboshye mu mutima.”

Yasabye urubyiruko rubona igihugu gitekanye kandi gifite amahoro ko na rwo rukwiriye gutanga umusanzu warwo mu kurwubaka no guharanira ko aya mahoro aramba.

Bamporiki yagaragaje ko iyi gahunda ya “Ndi Umunyarwanda” igamije guha umwanya urubyiruko rwatekerezaga kuvuga ariko rukazitirwa n’ipfunwe ry’ibyo ababyeyi na bene wabo bakoze, ko rukwiriye kubohoka imitima yarwo, rukavuga ibyo rwanyuzemo byabakomerekeje hagamijwe kubaka Ubunyarwanda nyabwo.

Bamporiki yasabye urubyiruko rw’i Nyamasheke kwatura rukavuga ukuri ku mateka yabaye mu rwego rw’ubwiyunge nyabwo. Yagize ati “Kuba Umunyarwanda biraryoshye ariko birabishye mu gihe bidasasiwe n’amateka nyayo y’igihugu kandi abantu bemera neza uko amateka y’u Rwanda yagenze.”

Minisitiri w’Urubyiruko n’Ikoranabuhanga mu Itumanaho n’Isakazabumenyi, Jean Philbert Nsengimana yavuze ko gahunda ya “Ndi Umunyarwanda” ikangurira urubyiruko gutera intambwe bakitandukanya n’amateka mabi yaranze ababyeyi n’abaturanyi babo, rukajya mu gihugu gishya cy’Ubunyarwanda bwuzuye kandi n’uwumva ababajwe n’ibyo bene wabo bakoze akaba yabisabira imbabazi yerekana ko yitandukanyije na byo.

Minisitiri Nsengimana, akoresheje imvugoshusho y’umutaka, yagaragaje ko higeze kubaho umutaka utwikiriye Abahutu n’utwikiriye Abatutsi, yerekanye ko hari igihe cyageze, bamwe mu Bahutu bakava mu mutaka wabo bakajya kwica Abatutsi (Jenoside); ariko ko nyuma y’uko Jenoside ihagaritswe, Leta y’Ubumwe yavanyeho ya mitaka ahubwo igashyiraho umutaka umwe uhuza Abanyarwanda.

Ku bw’ibi, Minisitiri Nsengimana yasabye urubyiruko kutafatwa n’iyi mitaka yabayeho y’ubwoko ahubwo ko bakwiriye kumva ko ari Abanyarwanda, bose bagaharanira kubaka u Rwanda ruzima.

Minisitiri Nsengimana agaragaza ko igikenewe cyane ku rubyiruko ari ugusobanukirwa amateka mabi yaranze u Rwanda ariko bakirinda guheranwa na yo. Aha yasobanuye ko nta muryango w’Umunyarwanda utabana n’igikomere cyaturutse kuri Jenoside kuko utariciwe, yagezweho n’ubuzima bubi mu muryango we bwaturutse ku ngaruka za Jenoside yakorewe Abatutsi.

Minisitiri Nsengimana yagize ati “Ibyo bikomere byose rero iyo abantu babibayemo ntibature, ntabwo bikira. Turagira ngo abantu bakire ibyo bikomere. Bavuge, bajye ahagaragara. Agahinda ufite, ipfunwe ufite; ubivuge, bagufate mu mugongo utere intambwe; kugira ngo twubake igihugu gishya ariko tuzi ko dufatanye urunana, intugu zireshya nk’abonse rimwe.”

Nyuma y’ubutumwa bwatangiwe muri iyi gahunda ya “Ndi Umunyarwanda” bamwe mu rubyiruko rwo mu karere ka Nyamasheke bagaragaje kunyurwa n’impanuro bahawe, maze bagaragaza ko ikibashishikaje ari ukumva ko ari Abanyarwanda ndetse babivuga mu buhamya berekana ko abari baboshywe ku mutima babohotse.

Uru rubyiruko kandi rwaboneyeho akanya ko guhamya ko ruzaharanira ubumwe n’ubwiyunge mu rwego rwo kubaka u Rwanda, aho buri wese azajya yumva ko ari Umunyarwanda kuruta kwitwikira umutaka w’amoko.

Emmanuel Ntivuguruzwa