Ni mu minsi itageze icyumweru Umunyamabanga Uhoraho muri Minisiteri y’Ubuzima, Dr Hakiba Solange, abajijwe iki kibazo n’ umunyamakuru wa Kigalitoday i Kirehe akavuga ko abo baturage bihangana ko ikibazo cyabo kigiye kwihutishwa.

Imwe mu nyubako z’Ibitaro bya Kirehe abo bakozi bubatse.

Ubwo inkuru yabageragaho ku wa 24 Werurwe 2015 ko amafaranga yageze kwa Rwiyemezamirimo Murenzi abari hafi banyarukiyeyo batangira kuyafata.

Mu byo batangarije Kigalitoday bavuga ko aya mafaranga basaga nk’abayahebye mu gihe kirekire yari amaze ngo bayakesha itangazamakuru.

Uwanyirigira Grâce agira ati “Burya wazaga kutubaza amakuru twari tuzi ko ntacyo bizatanga nyuma y’iminsi itanu inkuru ihise twumva badutumyeho ngo tujye guhembwa, Kigalitoday irakabyara mwadukoreye ubuvugizi ubu bayampaye yose nta n’ijana bansigayemo pe”.

Kwizera Emmanuel, we aragira ati “Ni ibyishimo nari nayobotse ubuhinzi nenda kwicwa n’inzara ntakeka ko nzishyurwa none baratwishyuye yose ubu nsubiye iwanjye i Rubavu ndishimye rwose abanyamakuru mwarakoze".

Kigalitoday yegereye bamwe mubakopaga abo bakozi bavuga ko nyuma yo guhembwa bagiye babishyura n’umutima mwiza.

Bavuga ko ayo mafaranga bari barayirutseho igihe kinini bageraho baratuza none kubera ubuvugizi ngo bishyuwe.

Mukansengiyumva Juliet ucuruza butike mu isantere ya Kirehe agira ati“Bari bamfitiye arenga ibihumbi ijana nsa n’uwayahebye nuko numva barampamagaye ngo banyishure.Mana bagiye nk’imfura rwose ni abana beza, banyishyuye yose n’umutima mwiza ntacyo mbaveba”.

Nshimiyimana Jean Nepo ushinzwe ububiko kwa Rwiyemezamirimo Murenzi avuga ko ubu amafaranga yaje abakozi batangiye guhembwa ngo umukozi ayo yakoreye yose ari kuyahabwa akaba asaba abatuye kure batashye badahembwe ko imiryango ifunguye ko basa bagafata amafaranga yabo.

Ati“Ubu ibiro birafunguye uzi ko yakoze hano wese yadusanga tukamuhemba amafaranga yose yakoreye, hari abatuye kure batashye badahembwe na bo rwose isaha bazira turabahemba nta kibazo nibirangira turatanga imfunguzo ibitaro bitangire bikore”.

Aba bakozi bahembwe nyuma y’igihe kinini bategereje ari nako basaba ubuyobozi bw’akarere kabavuganira bakabona amafaranga bakoreye dore ko abenshi ari abagiye baturuka kure.

Servilien Mutuyimana