Kiliziya Gatolika ntikozwa ibyo kwirukana Abihaye Imana bahamijwe Jenoside

Umushumba wa Diyosezi ya Butare akaba n’Umuyobozi w’Inama Nkuru y’Abepiskopi Musenyeri Philippe Rukamba aravuga ko Kiriziya Gatolika idateganya guca Umupadiri cyangwa Umubikira wakoze akanahanirwa ibyaha bya Jenoside yakorewe Abatutsi.

Musenyeri Philippe Rukamba, Umushumba wa Diyosezi ya Butare akaba n
Musenyeri Philippe Rukamba, Umushumba wa Diyosezi ya Butare akaba n’Umuyobozi w’Inama Nkuzu y’Abepiskopi

Abivuze mu gihe Umunyamabanga nshingwabikorwa wa Komisiyo y’igihugu yo kurwanya Jenoside (CNLG) Dr. Jean Damascene Bizimana avuga ko bitari bikwiye ko abapadiri n’ababikira bahamijwe ibyaha bya Jenoside yakorewe Abatutsi bakomeza imirimo yabo nyuma yo kurangiza ibihano.

Umunyamabanga nshingwabikorwa wa CNLG Dr. Jean Damascene Bizimana agaragaza ko hari abapadiri bakoe Jenoside hirya no hino mu bigo bakoragamo cyangwa bayoboraga kimwe na bagenzi babo b’ababikira, barangije ibihano ku cyaha cya jenoside ariko bakaba bimereye neza mu mirimo basubijwemo.

Urugero atanga ni urwa Padiri Denys Sekamana warangije igihano cy’imyaka 15 akaba yaragarutse ari muri Diosezi ya Butare ndetse n’abandi Bapadiri babiri b’i Cyangugu barangije ibihano by’imyaka 20 ubu bakaba baragarutse mu mirimo yabo.

Agira ati “Kuki Umukirisitu wabanzwe acibwa muri Kiliziya Gaturika, kuki Umupadiri wakoze Jenoside adacibwa mu Bupadiri, ni ikintu gikomeye tugomba kuzakomeza kuganiraho nk’inzego kugira ngo Kiliziya Gaturika yumve uburemere bwa Jenoside”.

Dr. Bizimana kandi atanga urugero rw’Umubikira witwa Soeur Jertulde wayoboraga ikigo cy’ababikira cya Sovu muri Diyosezi ya Butare na Mugenzi we Soeur Kizito bakoranaga bahamwe n’ibyaha bya Jenoside yakorewe Abatutsi bari barahungiye i Sovu mu cyahoze ari Komine Huye.

Dr. Bizima avuga ko abo babikira bahamwe n’ibyaha byo kwica Abatutsi bari bahungiye mu kigo cya Sovu, n’abatwikiwe ku ivuriro riri hafi y’icyo kigo batwikishijwe risanzi ku itariki 06 Gicurasi 1994.

Agira ati,” Dufite ikibazo gikomeye, kuko abapadiri n’ababikira bahamwe n’ibyaha bya Jenoside barangiza ibihano bagasubira mu mirimo yabo. Abo babikira umwe yahanishijwe igihano cy’imyaka 15 undi icy’imyaka 12 y’igifungo, ubu barabirangije basubiye mu bigo by’ababikira mu Bubirigi bari gusenga”.

Umushumba wa Diyosezi ya Butare akaba n’Umuyobozi w’Inama nkuru y’Abepisikopi mu Rwanda Musenyeri Philippe Rukamba we asanga Kiliziya nta kundi yagenza abo Bapadiri n’Ababikira kuko nta mategeko abiteganya.

Naho ku kuba bakomeza kuba Abapadiri ngo nta kundi byagenda kuko ntibashobora kwirukanwa cyangwa kwamburwa ubupadiri n’ubwo baba barahamwe n’ibyaha bikomeye bya Jenoside, cyakora ngo hari ububasha batemerewe nko gutura ibitambo rusange bya Misa cyangwa kuba umuyobozi wa za Paruwasi.

Agira ati,” Sinzi uko yenda bo babyumva ariko twe dusanga nta kundi twabigenza kuko ntabwo twabirukana, tubaha indi mirimo nk’iyo gukora mu biro, icyo tutabemerera ni nko kubaha uburenganzira bwo kwita ku bantu nko kuyobora za Paruwasi cyangwa kungiriza abayobozi bazo.”

Naho ku babikira soeur Jertulde na Kizito bararangije ibihano bagasubira mu mirimo mu Bubiligi, na ho ngo hari imirimo batemerewe gukora ariko ntabwo basabirwa kwirukanwa kuko ngo hari ibyo ibigo byabo mu Bubiligi bibakoresha kandi bitirengagije ko bakoze Jenoside.

Naho ku kibazo cya Padiri Hormisdas warekuwe n’Urukiko mpanabyaha rwashyiriweho u rwanda rwa Arusha, ushyirwa mu majwi ko yakoze Jenoside n’ubwo urukiko rwamugize umwere, Musenyeri Rukamba avuga ko ntacyo yabihinduraho mu gihe ubutabera bwakoze akazi kabwo.

Cyakora ngo kuba akomeje gushinjwa ibyaha bya Jenoside, Leta y’u Rwanda ni yo ikwiye kongera kumushakisha akaba yabazwa ibyo akurikiranweho akabihanirwa mu gihe byaba bimuhamye.

MENYA UMWANDITSI

kigalitoday android app mobile

Ibitekerezo   ( 6 )

Nonese kuki twanga ko baba abapadiri bakaba abasirikare ?nibibereho nubundi baratwiciye twarakiriye umukozeho induru zavuga

MBOMBO yanditse ku itariki ya: 27-05-2019  →  Musubize

Ibaze gufata umuntu wahanywe no kwica ukamujyana gukora kwa Muganga !!

Irarora yanditse ku itariki ya: 23-05-2019  →  Musubize

NibYokoko guhamwanicyaha byumwihariko abihayimana bakozejenoside yakorewe abatutsi.none se abayobozibakiriziya Bafata abapadri n’abam a seri bakoze ibyaha bagasubiramukazi?dukomezetwibaze kiliziyayontabihano itanga kiri abobantu?

Benoit habumuremyi yanditse ku itariki ya: 22-05-2019  →  Musubize

Musenyeri Rukamba nawe yacitse ku icumu.Ariko birumvikana ko mbere na mbere agomba kurwana "ku mugati utubutse" ahabwa na Kiliziya Gatolika.UMUGATI ni ikintu kibi.Bariya bateguye Genocide,babitewe no kwikanga ko bagiye kubura Umugati bari bafite.Jyewe nk’Umukristu,icyo nshija amadini muli rusange,nuko aho gukorera Imana,bashyira imbere umugati ayo madini abaha.Bigatuma bivanga cyane muli Politike kandi Yesu yarabibujije Abakristu nyakuri.Ndibuka muli 1994,iyo abasirikare ba Habyarimana bajyaga ku rugamba,Abapadiri n’aba Pastors babanzaga kubasengera ngo Imana iri kumwe nabo,bazatsinda FPR.Ndetse bakabaha n’amashapule,bizera ko azabarinda amasasu y’umwanzi.Niba koko amadini yakoreraga Imana aho gukorera inda zabo nkuko Abaroma 16:18 havuga,nta Genocide yali kuba mu Rwanda.Amadini,aho kuba igisubizo,niyo atera ibibazo muli iyi si.Niyo mpamvu Bible ivuga ko ku munsi wa nyuma,Imana izatwika amadini y’ikinyoma,hamwe n’abayoboke bayo.Imana idusaba "kuyasohokamo" niba tudashaka kuzarimbukana nayo nkuko Ibyahishuwe 18:4 havuga.

Sendegeya yanditse ku itariki ya: 21-05-2019  →  Musubize

Musenyeri Rukamba,koko nta soni nawe w’umucikacumu ushyigikiye bagenzi bawe bishe bene wanyu?Nkuko Comment ya Munyemana ibivuga hejuru hano,abanyamadini baba bishakira Umugati,aho gushaka Imana.Niyo mpamvu bivanga cyane muli Politics,bitwaje Bible.Birababaje.Ubu se koko najya imbere ya Padiri Seromba akampa Ukarisitiya?Nkibagirwa imbaga y’abatutsi yasenyeho Kiriziya I Nyange??? Rukamba we,uhemukiye Imana na bene wanyu.
Kubera kwishakira Umugati.Gatolika,Anglican Church,Adventits,Abaslamu,etc...,bakoze amabi menshi muli iki gihugu guhera muli 1959.Abantu nemera batakoze Genocide,nubwo ntari we,ni Abayehova bonyine.

munyemana yanditse ku itariki ya: 21-05-2019  →  Musubize

oya rwose ntibakwiye gusubiramo....retraite particuliere

phbe yanditse ku itariki ya: 21-05-2019  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka