Kigali: Habonetse imibiri ibarirwa muri 200 y’abishwe muri Jenoside (Video)

Mu Murenge wa Rwezamenyo mu Karere ka Nyarugenge mu Mujyi wa Kigali habonetse imibiri y’abishwe muri Jenoside yakorewe Abatutsi ibarirwa muri 200.

Iyi ni imyenda abo bantu bari bambaye igihe bicwaga
Iyi ni imyenda abo bantu bari bambaye igihe bicwaga

Iyo mibiri yabonetse mu Kagari ka Kabuguru ya mbere, ahavumbuwe ahantu hajugunywe imibiri y’abantu bishwe muri Jenoside yakorewe Abatutsi mu 1994.

Aho hantu ni mu rugo rw’uwitwa Rwagasana Jean Baptiste hakaba hariciwe umuryango we ndetse n’indi miryango y’abantu babarirwa hagati ya 100 na 200 bose bakaba barajugunywe muri urwo rugo.

Nyuma yo kumenya ko aha hantu hiciwe abantu ndetse n’imibiri ikaba ari ho yari ikiruhukiye, inzego zitandukanye zirimo ubuyobozi bw’akarere, umurenge, Ibuka, n’Ingabo z’u Rwanda (RDF) ku bufatanye n’abarokotse bo muri iyi miryango, harimo kubera igikorwa cyo gushakisha imibiri cyatangiye ku wa gatanu tariki 20 Nzeri 2019 kikaba gikomeje.

Ingabo z
Ingabo z’u Rwanda zagaragaje uruhare mu gushaka iyo mibiri zifashishije imashini

Kuba nyuma y’imyaka 25 Jenoside yakorewe Abatutsi mu Rwanda ibaye, hirya no hino mu gihugu hakaba hari ahantu hakiboneka ahajugunywe abantu bishwe, batarashyingurwa mu cyubahiro, bituma umuntu wese ubyumvise ahita yibaza impamvu amakuru yatinze gutangwa n’uburyo yabonetse. Ni muri urwo rwego Kigali Today yashatse kumenya uburyo aya makuru yamenyekanye avuga ko mu rugo kwa Rwagasana hiciwe abantu ndetse n’imibiri ikaba ariho ikiruhukiye.

Umwe mu barokokeye muri uru rugo kwa Rwagasana Jean Baptiste, witwa Carine Uwanziga uba mu gihugu cy’u Bubiligi, yasobanuye uko aya makuru yamenyekanye.

Ati : “Hari mugenzi wanjye uba mu Bufaransa witwa Aline Mucunda warokokeye hano, yavuye mu mirambo yari yegeranye na Papa na mukuru wanjye, nuko agahora ansaba ngo nzaze ambwire ijambo rya nyuma rya papa. Mu kwezi kwa 5 k’uyu mwaka nibwo nabashije kugira imbaraga zo kumwitaba ngo abimbwire. Ngezeyo twaraganiriye atangira kumpa ubuhamya bigera ubwo ambwira iby’iki cyobo arabinsobanurira. Ngeze mu Bubiligi naganiriye n’abana bo kwa Rwagasana dufata icyemezo cyo kuza mu Rwanda kugira ngo turebe koko ko tubona abantu bacu”

Carine Uwanziga warokokeye kwa Rwagasana yasobanuye uko amakuru y
Carine Uwanziga warokokeye kwa Rwagasana yasobanuye uko amakuru y’ahajugunywe iyi mibiri yamenyekanye

Carine Uwanziga akomeza avuga ko nta gushidikanya ko imibiri barimo kubona ari iy’abantu babo kuko babashije kubona ibimenyetso bifatika, nk’imyenda n’inkweto by’abantu babo bari bambaye babica.

Batangira iki gikorwa cyo gushakisha imibiri, bari bazi ko harimo imiryango ibiri, uwa Rwagasana n’uwa Karambizi Alphonse, ariko baje gutungurwa n’uko basanze harimo abantu benshi.

Ibi byatumye iki gikorwa kidakomeza kuba ku rwego rw’imiryango ibiri, ahubwo cyasabye ubutabazi bw’inzego zisumbuyeho zirenze n’umurenge.

Umunyamabanga Nshingwabikorwa w
Umunyamabanga Nshingwabikorwa w’Umurenge wa Rwezamenyo avuga ko batunguwe no kubona iyo mibiri aho hantu

Umunyamabanga Nshingwabikorwa w’Umurenge wa Rwezamenyo Stella Mbabazi yagize ati “Bari babifashe nk’ibyoroshye, bazi ko ari imiryango ibiri gusa irimo. Twaje gutungurwa n’uko twasanze harimo imibiri y’abantu benshi, dusaba ubufasha ku zindi nzego zirimo Ingabo z’igihugu (RDF) kuko biturenze nk’umurenge”.

Mbabazi akomeza avuga ko aha hantu ntawashoboraga kumenya ko haba hari imibiri y’abantu bishwe kuko hari ubusitani bushashe neza ku buryo ubirebye usanga barabatwikiriyeho itaka kugera nko muri metero ebyiri z’ubujyakuzimu. Mu byobo by’umusarani n’ibifata amazi byari bihari nta mibiri basanzemo.

Perezida wa Ibuka mu Karere ka Nyarugenge Rutayisire Masengo aravuga ko iki gikorwa bacyakiriye mu buryo bubiri ati: “Ku ruhande rumwe ni ibyishimo ku bacitse ku icumu, ku babuze ababo, uyu munsi nyuma y’imyaka 25 bakaba bababonye bagiye kubashyingura mu cyubahiro, biruhura imitima. Ku rundi ruhande ni ukugaya, birababaje kubona amakuru nk’aya atangwa n’abantu batuye hanze y’u Rwanda, i Burayi, nyamara hano hatuye abantu benshi cyane barimo n’abagize uruhare mu kubica, ariko bose barwaye indwara yitwa ceceka”.

Masengo akomeza avuga ko kudatanga amakuru y’aho abantu bishwe muri Jenoside yakorewe Abatutsi bajugunywe, bibangamira urugendo rw’ubumwe n’ubwiyunge Abayanyarwanda biyemeje.

Urubyiruko rwa AERG rwafatanyije n
Urubyiruko rwa AERG rwafatanyije n’abaturage b’umurenge wa Rwezamenyo mu gushakisha imibiri

Hagendewe ku makuru yatanzwe, n’uko iyi mibiri igaragara, bishwe urupfu rw’agashinyaguro kuko bicishijwe grenade, amasasu, ibyuma, ndetse no kubatwika hakoreshejwe acide.

Ikindi ni uko mu mibiri yabonetse harimo umutwe w’umwana umwe gusa, mu bantu bagera kuri 200 bahiciwe, kuko ngo hari umugore wazaga abantu bamaze kwicwa agatwara imitwe yabo ariko nta wuzi aho yayijyanaga, n’icyo yayikoreshaga.

Izi ni inkweto abishwe bari bambaye
Izi ni inkweto abishwe bari bambaye

Aya makuru y’uko yatwaraga imitwe yatanzwe muri gacaca ariko ateshwa agaciro, byitwa ko ari inzangano nyamara nyuma yo kubona iyi mibiri byahise byemezwa ko aya makuru yari ukuri. Umuyobozi wa Ibuka mu Karere ka Nyarugenge akaba yasabye inzego bireba ko uyu mugore yakurikiranwa n’ubutabera.

Reba amashusho (Video) asobanura iby’iyo mibiri yabonetse mu Murenge wa Rwezamenyo

MENYA UMWANDITSI

kigalitoday android app mobile

Ibitekerezo   ( 4 )

birababaje kubona imyakayose ishize hari imibiri ingana gucyo itaraboneka kubwanjye ndumva hakurikiranwa abahatuye kuko mugani barwaye ingwara yitwa ceceka gusa nihanganishije iyimiryango yabuze ababo1994

patrick yanditse ku itariki ya: 25-09-2019  →  Musubize

Biratangaje niba hali abantu bari batuye aho hantu genocide iba nubu bakihatuye bakaba ubu batarafatwa kandi bigaragara,ko kuba barahishe,amakuru aruko alibo bari mu bishe abo bantu keretse niba genocide yarabaye barahumye harya ngo abakoze genocide basabirwa,gufungurwa ahubwo nabo babasangemo a bavuga ubumwe nubwiyunge ndumva basubiza amaso inyuma bakarebera urugero kuli Rwezamenyo nyuma yimyaka 25!!

Lg yanditse ku itariki ya: 25-09-2019  →  Musubize

Birababaje kandi biteye agahinda.Gusa bwa BUMWE n’UBWIYUNGE baririmba bamenye ko buri kure nk’ukwezi.Kwiyunga biba ku mutima.Iriya mibare yuko abantu biyunze kuli 85% ni ibintu fictive gusa.Abatanga iriya mibare baba bagamije kwishakira "UMUGATI" gusa,bagatekinika.Nabo bakwiye gukurikiranwa.Nkuko Ibyakozwe igice cya 17,umurongo wa 26 havuga,abantu twese duturuka ku Muntu umwe.Icyo Imana yizeza abantu,nuko mu isi nshya dusoma muli 2 Petero igice cya 3,umurongo wa 13,nta Ronda-bwoko rizabamo,kubera ko ku munsi wa nyuma,Imana izakura mu isi abantu bose bakora ibyo itubuza,igasigaza mu isi abayumvira gusa nkuko Imigani 2,imirongo ya 21 na 22 havuga.Icyo Imana idusaba twese,nuko tutahera mu gushaka ibyisi gusa,ahubwo tukabifatanya no gushaka Imana,mbere yuko uwo munsi w’imperuka uza.Abibera mu byisi gusa,Imana ibita abanzi bayo nkuko Yakobo 4,umurongo wa 4 havuga.Bisobanura ko itazabaha ubuzima bw’iteka muli paradizo.

gatare yanditse ku itariki ya: 25-09-2019  →  Musubize

Kuki abantu batuye aho hantu bari banahatuye muli genocide badafatwa,ngobakurikiranwe,ko kudatanga amakuru bigaragaza,ko abo alibo bishe abo bantu bafatikanije na bene wabo nihose cyane mumugi wa,Kigali buri gihe havumburwa ibyobo,nkabariya aliko impamvu itumvikana nuko abo barahousanga batabibazwa kandi ntakindi,kimenyetso Kiba gikenewe,ngobakurikiranwe ngaho ubumwe,nubwiyunge nibusagambe *

Lg yanditse ku itariki ya: 24-09-2019  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka