Guverineri w’intara y’uburasirazuba Uwamariya Odette, abayobozi b’uturere twa Kayonza na Rwamagana n’abandi bayobozi bakurikiranye inama yahuje abakozi ba Minisiteri y’ubutegetsi bw’igihugu n’abayobozi mu nzego z’ibanze mu gihugu hose, hifashishijwe uburyo bwa Video Conference.

Iyo nama yabaye tariki 16/10/2013 yari iyobowe na Minisitiri w’ubutegetsi bw’igihugu, James Musoni, ikaba yasobanuriwemo ingamba nshya zo kugabanya umubare w’Abanyarwanda bari mu bukene n’uw’abari munsi y’umurongo w’ubukene mu gihe cy’imyaka itanu iri imbere.

Biteganyijwe ko buri karere kazagira icyumba cy’inama kizajya gifasha abayobozi kugira ngo babashe gukurikira inama n’ibiganiro bibera hirya no hino hifashishijwe uburyo bwa Video Conference, ariko mu turere tumwe tw’igihugu ibyo byumba ngo ntibiruzura.

Iyi ni yo mpamvu ubwo ubu buryo bwa Video Conference bwatangizwaga mu gihugu, hari abayobozi b’uturere bagiye mu tundi turere twatangiye gukoresha iryo koranabuhanga kugira ngo bakurikire iyo nama.

Benshi bemeza ko uburyo bwa Video Conference buzagabanya amafaranga yatakariraga mu ngendo abayobozi bakoraga bagiye gukurikira inama n’ibiganiro i Kigali.

Ubu buryo ngo buzanafasha abayobozi kubona umwanya wo kuzuza izindi nshingano baba bafite, kuko igihe bamaraga mu nzira bava mu nama cyangwa bajyayo bazajya bagikoresha bakora ibindi.

Cyprien M. Ngendahimana