Ntibishoboka ko wabwira abo uhagarariye ngo bakore kandi bakubona buri munsi nawe ntacyo ukora; nk’uko Mwiseneza Jean Claude uyobora ikigo cy’urubyiruko cya Kayonza abivuga.

Avuga ko urubyiruko rukwiye gushishikarira kwihangira imirimo, ariko bigahera mu baruhagarariye kugira ngo babere abandi urugero.

Ati “Ntawe utanga icyo adafite, birasaba ngo twebwe dukangurira urubyiruko gukora tube ari twe dufata iya mbere kugira ngo natwe tubigereho. Niba ndi umuyobozi w’urubyiruko nkaba nirirwa nta kazi nkora, ntabwo nzajya gukangurira urubyiruko ngo rukore kandi nanjye rubona ntacyo nkora”.

Yavuze ko hari amahirwe menshi akikije urubyiruko rw’i Kayonza ariko rukaba rutayabyaza umusaruro. Urugero ni nk’ikiyaga cya Gishanda cyegereye Parike y’Akagera kimwe n’ibindi biyaga biboneka mu karere ka Kayonza nka Rwakigeri bitabyazwa umusaruro kandi byakabaye byinjiriza urubyiruko ruramutse rwishyize hamwe.

Mwiseneza avuga ikiyaga cya Gashanda gishobora guterwamo amafi, cyangwa aho kiri hagatunganywa hakaba ahantu nyaburanga ku buryo abantu bashobora kujya bava gusura Parike bakabanza kuharuhukira mbere y’uko bakomeza urugendo.

Anavuga ko hari imishinga mito mito urubyiruko rusuzugura kandi itanga amafaranga menshi agasaba abaruhagarariye guhumuka bakamenya ibyateza imbere urubyiruko muri rusange.

Ati “Ibihumyo n’amagi usanga byarabuze mu mahoteri kandi abantu barabikunda cyane, wanareba ugasanga ubworozi bw’inkoko cyangwa ubuhinzi bw’ibihumyo butagoye. kuri ibyo abantu basuzugura twagera kure”.

Abahagarariye inzego z’urubyiruko mu karere ka Kayonza bavuga ko bagiye gukora iyo bwabaga bagateza imbere urubyiruko barushishikariza gukora no guhanga imirimo, nk’uko bivugwa na Havugimana Alexandre uhagarariye urubyiruko rwo mu murenge wa Kabare.

Cyprien M. Ngendahimana