Ibi byatangajwe mu imurikabikorwa ry’uturere tugize Intara y’iIburengerazuba, aho Guverineri w’Intara Kabahizi Celestin yagaragaje ko uturere twa Karongi na Nyamasheke dufite abakene benshi ugereranyije n’utundi turere.

Ibipimo by’ubushakashatsi bwakozzwe mu myaka ya 2010-2011 byagaragaje ko uturere twa Karongi na Nyamasheke dufite abaturage bari mu nsi y’umurongo w’ubukene bari hejuru ya 50% kandi icyifuzo cya leta y’u Rwanda ari ukumanuka bakagera byibuze kuri 40%.

Guverineri Kabahizi yaboneyeho gushimira akarere ka Nyabihu kuba ari ko kagaragaramo abakene bake. Mu mwaka wa 2012 akarere ka Nyabihu kabaye aka mbere mu turere tw’icyaro twikuye mu bukene, kakaza ku mwanya wa gatanu mu turere dufite abakene bake mu gihugu ku gipimo cya 27%.

Imurikabikorwa ry’Intara y’Iburengerazuba ryanerekanye ko mu Ntara hakigaragara ibibazo by’imirire mibi, ariko Guverineri Kabahizi arishimira ko byibuze bamanutse bakagera kuri 0,3% n’ubwo nabyo bitari bikwiye nk’uko umukuru w’igihugu yabisabye agira ati: Nta mwana w’Umunyarwanda ukwiye kwicwa n’inzara.”

Guverineri Kabahizi yongeye gusaba uturere tukiri inyuma mu bwisungane mu kwivuza gukurikiza urugero rw’akarere ka Karongi kongeye kuza ku mwanya wa mbere n’amanota 100%. Uyu muhigo AbanyaKarongi bawugezeho kubera kwisungana mu bimina, ari nabyo umuyobozi w’intara asaba utundi turere gufatiraho urugero.

Guverineri avuga ko uturere twa Nyabihu na Rubavu tukiri inyuma kubera ko uhasanga imiryango ifite abana benshi, bityo kubatangira mitiweli bose bikaba ingorabahizi, aboneraho gusaba ababyeyi bakibyara kuringaniza urubyaro n’ubushobozi bwabo ndetse n’ubw’igihugu cyose.

GASANA Marcellin