Ubwo yaganiraga na Kigali Today kuwa 16/03/2014, uwitwa Gashayija Paul, umwe muri abo Banyarwanda bahungutse baturutse gihugu cya Tanzaniya yagize ati “Guhabwa ni byiza ariko natwe dukeneye aho dutura ku buryo buhamye, ahubwo natwe tugatangira kwigira no kujya dutanga mu bihe bya vuba.”

Akomeza agira ati “Iyo nibura twabaga dufite aho tuba n’iyo byaba n’isambu ya metero icumi ku icumi, twamenya uko tuhabyaza umusaruro.” Uyu Gashayija yashimiye abaturage bo mu Kagari ka Gacaca ko ngo kuva bahagera, babakiriye bakaba baranabibutse bakabafashisha ibyo kurya no kwambara bakabagaboka mu mpera z’icyumweru gishize.

Umunyamabanga Nshingwabikorwa w’Umurenge wa Rubengera, Mutuyimana Emmanuel, avuga ko ubuyobozi burimo gukora ibishoboka byose ngo batuze abo baturage.

Uyu Munyamabanga Nshingwabikorwa yabwiye Kigali Today ko bamaze kubona ibibanza bazabubakiramo amazu, ariko bakaba bategereje ko binyura mu nzira z’amategeko zikabyemeza ubundi bagatangira imirimo yo kububakira.

Bwana Mutuyimana ati “Dutegereje ko ibibanza babyegurirwa burundu biciye mu mategeko, mu cyumweru kimwe gusa imirimo yo kububakira ikaba itangiye.”

Abo baturage bari mu miryango itatu igizwe n’abantu 13 bahungutse birukanywe mu gihugu cya Tanzaniya. Inkunga bashyikirijwe n’abaturage b’akagari ka Gacaca binyuze mu itsinda rihakorera siporo, One Team Club, igizwe n’ibiribwa n’imyambaro bifite agaciro k’amafaranga y’u Rwanda ibihumbi 300.

Niyonzima Oswald