Mu gihe hari abibwira ko umunsi w’umurimo ari umunsi w’ikiruhuko ku bakozi ba Leta, ku bakozi b’akarere ka Kamonyi bishimiye kungurana inama n’abayobozi ba bo n’abakozi babaye indashyikirwa bagenerwa ibihembo.

Uyu mwaka umunsi mpuzamahanga w’umurimo uba buri tariki ya Mbere Gicurasi, ufite insanganyamatsiko igira iti “Duteze imbere umurimo twihutishe iterambere”.

Mu karere ka kamonyi kuva ku rwego rw’akagari kugeza ku karere, bibukirijwe inshingano za bo ari nako bagaragaza imbogamizi bahura nazo, maze bemeranywa n’ubuyobozi uburyo bwo gukemura ibibazo biri mu kazi.

Ingabire Emmanuel, umukozi ushinzwe ubworozi mu murenge wa Runda, akaba ari nawe wabaye indashyikirwa muri uyu murenge, ashima impanuro n’ubujyanama bahabwa ku munsi w’umurimo ku bibafasha kongera imbaraga mu mikorere.

Yagize ati “ Uyu munsi ntituwubara nka konji, tuba twaje n’ubundi ku kazi harimo guhugurwa ku murimo n’abayobozi bacu. Uko duhura n’abayobozi tugasabana bituma twongera imbaraga ndetse no gukunda umurimo.”

Umuyobozi w’akarere Rutsinga Jacques asanga agereranya umunsi w’umurimo n’umwiherero w’abakozi, kuko uri umwanya wo gusesengura ibyo bakora no gufata ingamba zo kubikora neza; kugira ngo bitange umusaruro wihutisha iterambere ry’akarere.

Abakozi 14 batoranyijwe na bagenzi babo nk’ababaye indashyikirwa mu kurangiza inshingano, hashingiwe ku mihigo bihaye n’umusaruro bagaragaje, bahembwe amafaranga ibihumbi 100 buri wese.

Nyuma y’inama habaye umukino w’umupira w’amaguru wahuje abakozi b’akarere ka Kamonyi n’ikipe y’abavetera yo ku Ruyenzi yitwa Victory Fc urangira abakozi b’akarere batsinzwe ibitego 3 kuri 4 bya Victory FC.

Marie Josee Uwiringira