Ku ifishi y’ikingira y’urwo ruhinja mwana rubura icyumweru ngo rwuzuze ukwezi handitseho ko nyina yitwa Uwizeyimana Claudine, utuye mu mudugudu wa Gitura, Akagari ka Ryakibogo, umurenge wa Gishamvu, Akarere ka Huye.

Ku mugoroba wo cyumweru tariki 14/04/2013, uwo mugore wavugaga ko yerekeza i Butare n’amaguru akazagenda acumbika mu nzira kuko nta mafaranga yo kuriha imodoka afite; nibwo yinjiye mu rugo rwa Murekeyimana, ari mu mvura asaba icumbi.

Nk’uko Murekeyimana abitangaza, ngo uwo mugore ntiyahamusanze ahubwo yahasanze umugore we maze aramwakira, yemera no kumucumbikira. Yatashye mu ma saa mbiri z’ijoro, maze umugore amubwira ko hari umushyitsi, ufite uruhinja, undi nawe yumva nta kibazo aramureka araryama.

Bukeye mu gitondo, umugore yagiye gukingura asanga wa mushyitsi ntawe, ariko yasize umwana n’igishashi kirimo imyenda ye n’ifishi yo kumukingiriraho. Bahise bajya kugisha inama umukuru w’umudugudu maze abarangira ko bajyana ako kana ku biro by’umurenge.

Uyu mugabo ngo yageze ku biro by’umurenge wa Rugarika, bamusaba gusubirana ako kana, mu gihe bagishakisha nyina, ubuyobozi bw’umudugudu buramufasha kukabonera amata.

Uyu mugabo ariko ntiyanyuzwe kuko ngo nta bushobozi afite bwo kukarera. Asanganywe abandi bana be batanu kandi aba mu icumbi. Arasaba ko bamujyana mu miryango irera imfubyi kuko nyina wamutaye atazagaruka kumureba.

Umunyamabanga Nshingwabikorwa w’umurenge wa Rugarika, Rukimbira Emmanuel, avuga ko ubuyobozi bugiye gutanga amatangazo yo gushakisha nyina, mu gihe ataraboneka uwo mwana akaba ari uw’ubuyobozi.

Hagati aho, ariko aributsa abaturage ko batagomba gucumbikira umuntu batabanje kumwandikisha kwa nyumbakumi mu ikaye y’abinjira n’abasohoka, kandi ucumbika akabanza kwerekana ibyangombwa bye.

Marie Josee Uwiringira