Avuga ku ruhare rw’abaturage mu kugera ku mihigo, Umuyobozi w’Akarere ka Kamomnyi Wungirije ushinzwe Ubukungu n’Iterambere, Uwineza Claudine, yavuze ko uretse ibikorwa remezo byubakwa na Leta, ibindi bikorwa ubuyobozi buhiga biva mu mihigo y’abaturage.

Ibyo ngo bifasha ubuyobozi n’abaturage kugira imyumvire imwe ku bikorwa bifite akamaro rusange.

Abaturage bishimira ko gahunda yo guhiga yageze no ku muturage wo hasi, kuko byabafashije kugira gahunda z’iterambere bashingiye ku byo ingo zabo zikeneye, bitandukanye na mbere aho bibwiraga ko gukorera ku ntego bishoborwa n’muntu ufite aho akura amafaranga hahoraho.

Sibomana Edouard wo mu Mudugudu wa Nyagacyamo, Akagari ka Muganza mu Murenge wa Runda, akaba akora umwuga w’ubuhinzi, avuga ko guhiga byatumye amenya kuzigama amafaranga ava mu musaruro.

Ngo abasha kurihira amafaranga y’ishuri y’abana batatu biga mu mashuri yisumbuye; by’umwihariko ngo uyu mwaka Sibomana yahize kugura inka yo kumuha ifumbire kandi yabigezeho.

Gahunda y’imihigo y’ingo yatangiranye n’umwaka w’ingengo y’imari wa 2012/2013, buri mukuru w’umuryango yasabwe kwandika mu ikaye ibikorwa by’iterambere ateganya ko urugo rwe ruzaba rwagezeho mu gihe cy’umwaka.

Mu bikorwa by’abaturage byifashishwa mu mihigo y’uturere harimo Ubuhinzi n’ubworozi, kurwanya isuri, Biogaz, kwitabira bwisungane mu kwivuza, gukorana n’ibigo by’imari n’ibindi.

Marie Josee Uwiringira