Mu nama ubuyobozi bw’Akarere ka Kamonyi, bwagiranye n’abo baturage kuri uyu wa 4 Gicurasi 2015, abaturage bashimye ibikorwa remezo bagejejweho nk’imihanda yakozwe muri Gahunda ya VUP, ivuriro bahawe ndetse n’amashuri ariko bagaragaza ko hari ibindi bikenewe kugira ngo barusheho gutera imbere.

Uwitwa Vianney, utuye umudugudu wa Butera mu Kagari ka Sheli, avuga ko umudugudu wabo wasigaye mu yindi udafite amashanyarazi kuko abona abaturanyi bacanye ariko bo bakaba bari mu cyo yise « icyeragati ».

Avuga ko we n’ abaturage bagenzi be biteguye gushyiraho inkunga yabo aho yizeza ko bazagira uruhare mu gucukura umuyoboro w’amazi ndetse bakanatanga umusanzu w’amafaranga bunganira Leta ariko na bo bakagezwaho amashanyarazi.

Ibindi bikorwa rusange aba baturage bagaragaje nk’ibigomba gukemurwa n’umuyobozi w’akarere, ni ikibazo cy’Isoko rya Nkoto riri mu mbago z’umuhanda wa Kaburimbo, ndetse n’icy’inyubako y’ibiro by’Umurenge wa Rugarika bavuga ko bitajyanye n’igihe.

Dushimimana Emmanuel, umuyobozi w’abikorera muri Santeri ya Nkoto ho mu Kagari ka Sheli, avuga ko abacuruzi bamutumye gusaba ko iryo soko ryakwimurirwa ahandi muri Rugarika, ku buryo ryakomeza guteza imbere umurenge.

Naho Uwizeyimana Jean Damascene, wo mu Mudugudu wa Karehe muri Sheli, we avuga ko kuba ibiro by’umurenge wa Rugarika bikorera mu cyahoze ari Segiteri sheli, bitajyanye n’igihe, akaba asaba ko ubuyobozi bw’akarere bwazabubakira ibindi biro bigezweho.

Ibi bibazo , kimwe n’ibindi bikoreshwa amafaranga y’akarere biba byagaragajwe n’abaturage, umuyobozi w’akarere, avuga ko biri mu bikusanywa mu nama ubuyobozi bugirana n’abaturage kugira ngo bifasha mu gutegura igenamigambi ry’akarere.

Ibyasabwe ngo bizigwaho mu gutegura ingengo y’imari y’umwaka wa 2015-2016, bizigwaho.

Mu gihe aba baturage basabwa kwegerezwa ibikorwa remezo nk’amazi n’amashanyarazi, umuyobozi w’akarere na we abasaba gutura ku midugudu, kugira ngo ibyo bakeneye bazabibone ku buryo bworoshye.

Marie Josee Uwiringira