Ibitaro bya byapimye uwo murambo byatangaje ko Munyaneza atiyahuye ahubwo bishoboka ko yishwe, abamwishe bakamwambika umugozi mu rwego rwo kuyobya uburari. Ubu polisi y’akarere ka Ngororero ikomeje iperereza ku cyaba cyahitanye uyu mugabo; nk’uko bitangazwa n’umuyobozi wa polisi mu karere ka Ngororero, Carlos Kabayiza.

Umurambo wa Theophile Munyaneza wabonetse inyuma y’inzu ye afite umugozi mu ijosi mu gitondo tariki 12/03/2012 mu murenge wa Kageyo, akagali ka Muramba, umudugudu wa Murangara mu karere ka Ngororero. Yari umwalimu ku ishuli ribanza rya Gatovu (Centre Scolaire Gatovu).

Mbere yuko Munyaneza yitaba Imana yari yaraye arwana n’umugore we babanaga ku buryo butemewe n’amategeko ariko ntibaramenya niba uko kurwana kwaba gufitanye isano n’urupfu rwe; nk’uko bitangazwa n’umunyamabanga nshingabikorwa w’umurenge wa Kageyo, Mundanikure Joseph.

Mundanikure yongeyeho ko Munyaneza ngo yari asanzwe ari umuntu ugira amahane haba murugo rwe mu baturanyi no mu kazi ke k’ubwarimu.

Kwiyahura ni ingeso ikunze kugaragara muri kano gace kahoze ari muri komini Ramba yo mu cyahoze ari perefegitura ya Gisenyi. Polisi ivuga ko abakekwa kugira uruhare mu rupfu rwa Munyaneza bakiri ibanga kuko iperereza rigikomeje.Umurambo wa nyakwigendera washyinguwe tariki 13/03/2012.

Ernest Kalinganire