Abana barererwa muri icyo kigo bari basanzwe batozwa indangagaciro z’umuco ndetse na kirazira binyuze mu itorero ryabo ryitwa “ibirezi n’amasonga”.

Ibirori byo gutangiza ku mugaragaro itorero muri iki kigo byabimburiwe no gutoza abana ibyo urubyiruko rwo hambere rwigiraga mu itorero birimo imikino ngororamubiri igizwe no kwiruka, gutera umuhunda n’ingasire, gusimbuka urukiramende ndetse n’umurambararo ndetse no gukirana.

Umuyobozi wa GSNDP Cyanika, Padili Harerimana Valens yashimiye Leta y’ubumwe yagaruye itorero mu Banyarwanda ngo kuko rizagira uruhare runini mu kongera kubaka ubumwe bwabo, bagasubira ku ndangagaciro na kirazira zabarangaga mbere y’umwaduko w’abazungu.

Padili Harerimana yagize ati: “izo ndangagaciro tuvuga zari ubumwe, ubupfura, ubunyangamugayo, ubutwari, gukunda igihugu, ubumuntu n’ubunyarwanda, tutibagiwe n’izindi nko gushyira hamwe, kwakirana, gutabarana ndetse n’izindi.
Ariko muri izo zose usanga ubumwe bw’abanyarwanda aribwo buhatse izindi”.

Itorero ry’u Rwanda ryatekerejwe nk’umuti uzihutisha gahunda y’igihugu mu kubaka ubumwe n’iterambere ry’abanyarwanda hagamijwe kugera ku cyerekezo 2020 u Rwanda rwihaye, Padili Harerimana akaba ashima ko byanamanuwe ku nzego zo hasi ku midugudu no mu mashuri.

Uwavuze mu izina ry’intore “ibirezi n’amasonga”, Rwubakababiri Didas yashimiye igitekerezo cyo kugeza itorero ku nzego zo hasi kugeza no mu bigo by’amashuri, ngo kuko ari byiza kuba intore ukiri muto ukazakurana ibikorwa by’ubutore.

Yakomeje atangaza ko hari amasomo menshi bamaze kwiga arebana n’itorero haba irya mbere y’umwaduko w’abazungu ndetse n’ubu ryongeye gutangizwa, bakaba bariyemeje kuzagendera kuri ayo masomo ashyigikiye ubumwe n’ubupfura bw’Abanyarwanda.

Igikorwa nk’iki cyo gutangiza itorero ry’igihugu ku mugaragaro ngo ni icyo gushyigikirwa kugira ngo rihabwe agaciro rikwiye mu bigo by’amashuri, ibindi bigo nabyo bikaba bikwiye kuhakura urugero nk’uko Uwimana Eric, ushinzwe gukurikirana ibikorwa by’itorero ry’igihugu mu karere ka Nyamagabe yabitangaje.

Yavuze ko itorero ry’igihugu ryari irerero kandi rikaba n’ishuri ry’abantu bazagirira igihugu akamaro, rikaba ryarashenywe n’abazungu igihe bazaga mu Rwanda bashaka kurutegeka.

Uwimana kandi yabwiye urubyiruko ko ari umusemburo w’impinduka nziza kandi bazagira uruhare mu kwimakaza indangagaciro na kirazira z’umuco nyarwanda.

Yaboneyeho kumenyesha abanyeshuri bari kurangiza amashuri yisumbuye ko bazajya ku rugerero aho bazakora ibikorwa by’ubwitange bigirira abandi akamaro.

Emmanuel Nshimiyimana