Archbishop Dr Laurent Mbanda avuga ko iyo kaminuza izakira abantu b’ingeri zose

Byatangajwe kuri uyu wa 28 Werurwe 2019, ubwo abayobozi batandukanye muri iryo torero mu Rwanda bari mu biganiro na bagenzi babo b’aba Anglican bo muri Leta Zunze Ubumwe za Amerika, bigamije ubufatanye mu bintu binyuranye byiganjemo ibirebana n’iyogezabutumwa.

Archbishop wa Province y’u Rwanda mu itorero ry’aba Anglican, Dr Laurent Mbanda, avuga ko iyo kaminuza igiye gutangira izafasha benshi mu bavuga ubutumwa.

Yagize ati “Twarubatse kandi turakomeje, inyubako zimwe zaruzuye, dutegereje uburenganzira bw’Inama nkuru ishinzwe uburezi (HEC) tugatangira. Biri mu rwego rwo kubahiriza itegeko ryagiyeho umwaka ushize, rivuga ko umu Pasiteri agomba kuba nibura afite icyiciro cya mbere cya Kaminuza”.

Arongera ati “Twahawe igihe cyo kubategura cy’imyaka itanu none umwe uranashize, ni yo mpamvu rero y’iyo kaminuza, izadufasha kubigisha bakazamura ubumenyi. Turashaka ko icyo gihe twahawe cyarangira hafi bose barangije nibura icyiciro cya mbere cyangwa icya kabiri”.

Kaminuza y’aba Anglican iratangira gukora bitarenze uyu mwaka

Akomeza avuga ko iyo kaminuza izaba yitwa East African Christian University, ikazakira aba Pasiteri bose babyifuza bo mu matorero yose mu Rwanda, ari yo mpamvu ngo batayihaye izina ry’itorero ryabo.

Ikindi ngo ntizigisha ibya Theologie gusa ahubwo hazaba harimo n’andi mashami ku buryo umuntu aziga icyo ashaka nk’uko Dr Mbanda abisobanura.

Ati “Uretse Theologie tuzagira ubucuruzi, itumanaho, ubuzima rusange n’izindi kuko zizaba esheshatu. Tuzakira kandi n’abatari aba Pasiteri bazabyifuza kuko natwe tubakenera mu mirimo y’itorero cyangwa bakajya n’ahandi, bityo natwe dutange umusanzu wacu mu guteza imbere igihugu cyacu”.

Biteganyijwe ko iyo kaminuza yaba yatangiye gukora bitarenze uyu mwaka wa 2019 kuko ngo ibikenewe byose bihari ndetse n’abanyeshuri bamaze kwiyandikisha.

Aba Anglican bo mu Rwanda n’abashyitsi babo mu ifoto y’urwibutso

Uwaje akuriye itsinda ry’abavuye muri Amerika, Bishop Steeve Breedlove, yavuze ko ubufatanye ku mpande zombi ari ingenzi.

“Turahura tukaganira, tukavugira ubutumwa hamwe bikatwongerera ubusabane, ndetse tukanavuga no ku bindi byakongera umubano wacu n’u Rwanda”.

Muri Kamena umwaka ushize ni bwo Leta yatangiye gufunga insengero nyinshi zitari zujuje ibyangombwa, muri byo hakanabamo ko hari abayobora insengero batabikwiye ari bwo hashyizweho itegeko rivuga ko umu Pasiteri uyobora urusengero agomba nibura kuba yararangije kaminuza.

MENYA UMWANDITSI

Jean Claude Munyantore

Umunyamakuru

@ MunyantoreC

Reba inkuru zose nanditse ( 2071 )