Umukozi ushinzwe ubuzima n’umutekano mu kazi muri MIFOTRA, Kananga Patrick avuga ko nta kigo na kimwe cy’abikorera kigomba kunyuranya n’itegeko rishyiraho intumwa z’abakozi mu bigo bajyaho binyuze mu matora.

Uyu mukozi yatangarije Kigali Today ko biteganwa n’itegeko kandi hari n’ibihano bikomeye ku bakoresha bazabyirengangiza ntibakoreshe amatora ashyiraho intumwa z’abakozi mu bigo babereye abayobozi.

Icyakora akomeza avuga ko nta mpamvu yo kudashyiraho izo ntumwa z’abakozi mu bigo by’abikorera kuko bizarushaho guteza umurimo imbere no kwikemurira ibibazo byavutse hatabayeho kujya imbere y’umugenzuzi w’umurimo mu karere cyangwa mu nkiko ziburanisha imanza z’umurimo.

Abivuga atya: “Ikibazo cyose kizajya kivuka hagati y’umukozi n’umukoresha kizajya kibaza kunyura imbere y’intumwa y’abakozi batoye mu kigo, nibinanirana nibwo bizajya bijya ku mugenzuzi w’umurimo mu karere. Ariko hari ubwo bizajya bikemukira mu kigo bitarinze gufata iyo ntera”.

Ishyirwaho ry’izi ntumwa z’abakozi mu bigo by’abikorera ryamaze kwemezwa n’inama y’abaminisitiri, ubu hari icyizere ko nta kigo kizabirengaho ngo cyange amatora y’intumwa zihagarariye abakozi.

Umwe mu bakozi b’imwe mu mahoteri yo mu Karere ka Nyanza yatangaje ko hari byinshi bategereje ku ntumwa z’abakozi zigiye gutorwa.

Aragira ati: “Hari nk’uburenganizra bwacu bw’ibanze abakoresha batwima kubera ko tudafite umuntu ukerebutse washyizweho na bagenzi be ngo abavuganire. Intumwa y’abakozi nicyo cya mbere cy’ibanze izaba ishinzwe cyo guhuza umukozi n’umukoresha”.

Uyu mukozi akomeza avuga ko MIFOTRA yarebye kure mu gushyiraho intumwa y’abakozi mu bigo by’abikorera.

Jean Pierre Twizeyeyezu