Dr Habyarimana asoza amahugurwa y’iminsi ibiri yagenewe iri shyirahamwe taliki 07/08/2013 mu kumenya gahunga za Leta ku bumwe n’ubwiyunge hamwe no kubafasha kwiyubaka mu byo bakora, yatangaje ko ishyirahamwe Inyenyeri ryabaye indashyikirwa ku rwego rw’igihugu kubera ibikorwa ryakoze birimo kubaka imibanire y’abagize umurenge wa Bugeshi.

Muri uyu murenge abangirijwe imitungo muri Jenoside ndetse bakicirwa ababo bababariye ababahemukiye bituma amafaranga agera kuri miliyoni zirenga 100 abagombaga kuyishyura bayagumana maze bunga ubumwe buzira urwicyekwe.

Mudenge uyobora ishyirahamwe Inyenyeri avuga ko ibyo bakoze babikesha indangagaciro z’Abanyarwanda ba kera kandi basanga kwishyuza ababangirije imitungo batagifite byabakenesha bakaba barahisemo kubaharira kugira ngo imiryango yabo ibane mu mahoro kuko ibintu ataribyo bigomba kubahuza ahubwo bagomba guhuriza hamwe biyubakira igihugu.

Mu gihe henshi mu gihugu haboneka imanza zo kwishyuza imitungo yangijwe mu gihe cya Jenoside mu murenge wa Bugeshi izi manza ntizaharanzwe, iki gikorwa cyatumye iri shyirahamwe rigenerwa igikomwe cy’ubumwe n’ubwiyunge mu mwaka wa 2012 bashyikirijwe na Perezida Kagame.

Abagize iri shyirahamwe bahizemo kwimakaza ibikorwa byabo mu mu yindi mirenge baturanye ndetse bakaba bifuza gukorera mu tundi turere kandi barifuza ubufasha butuma ibikorwa byabo birushaho gukomera.

Narcisse Kalisa, umukozi w’umushinga Search for Common Ground avuga ko nkuko bafatanyije na Komisiyo y’ubumwe n’ubwiyunge mu gutegura amahugurwa yo kubongerera ubumenyi ngo niko bazakomeza kubaba hafi kugira ngo iri shyirahamwe rishobore kwimakaza amahoro n’ubumwe mu Banyarwanda bacyemura amakimbirane.

Umwe mu bagize iri shyirahamwe witwa Gahutu avuga ko bifuza ko ibikorwa batangiye bitaguma mu karere ka Rubavu ahubwo bishobotse byakwambuka bikagera no mu gihugu cya Congo baturanye ahakirangwa abantu bafite amakimbirane.

Sylidio Sebuharara