Mu myaka 21 amaze mu gisirikare, Sikubwabo ari ku ipeti rya Sergent mu gihe bamwe mubatangiye igisirikare nyuma ye bagiye bazamurwa mu mapeti, akavuga ko yicuza igihe yamaze mu mashyamba ya Repubulika iharanira demokarasi ya Kongo (RDC) no mu mirwano aho kuza kwiyubakira igihugu.

Sikubwabo yagarutse mu Rwanda tariki 5/12/2014 nyuma y’imyaka 16 avuye mu Rwanda kuko yarwanye intambara nyinshi z’abacengezi haba mu Karere ka Rubavu na Nyabihu ahitwa muri Giciye, akavuga ko yigeze no kuharasirwa ayobowe na Sous-Lieutenant Murokore kugeza asubiranye muri RDC n’abandi bacengezi bakajya ahitwa Gatembe muri Masisi.

Mu buzima bukomeye Sikubwabo avuga ko yatayemo igihe akorera FDLR n’abacengezi ngo bwibanze mu mirwano no gushaka amakuru, naho benshi mubo batangiranye igisirikare cya FAR yarazi muri FDLR-Foca bagiye bagwa mu mirwano itandukanye.

Ahera aho avuga ko FDLR ikunda abarwanyi bayo yagashyize intwaro hasi igataha mu Rwanda aho gukora barwana intambara badatsinda ahubwo bagwamo.

Sikubwabo avuga ko nko muri batayo yarimo muri Appolo abahoze mu gisirikare cya FAR ubu bari kumwe yabonye ari batanu abandi bagiye bagwa ku rugamba, naho abamenye ubwenge baratashye harimo n’uwitwaga Mbui wigeze kumuyobora ubu wibereye mu Rwanda.

Avuga ko abasirikare bakuru badafite icyo bicyeka bataha, ariko abazi ibyo basize bakoze mu Rwanda akaba aribo babangamira abashaka gutaha babashyiraho iterabwoba n’uburinzi.

Sikubwabo wari usanzwe uba Masisi ariko ashaka inzira yanyuramo yigarukira mu Rwanda, avuga ko FDLR-Foca yari isanzwe Walikale nyinshi ubu ibarirwa muri Rutshuru na Masisi ahari abaturage kugira ngo bizagorane kuyihiga no kuyirasaho.

Sikubwabo avuga ko abarwanyi benshi ba FDLR-Foca bari muri Masisi na Rutshuru ngo basabwe kutagendana imbuna n’imyenda ya gisirikare ahubwo bagiye bivanga n’abaturage bikorera ibikorwa by’ubucuruzi, ubuhinzi n’ubworozi kugira ngo nibabahiga bazababure, mu gihe intwaro zifite aho zabitswe n’abayobozi babo bazi aho abarwanyi babo bari igihe cyose babashaka bababonera.

Sylidio Sebuharara