Visi Perezida w’Umutwe w’abadepite mu Nteko ishinga amategeko, Uwimanimpaye Jeanne-d’Arc yavuze ko Maina waje kureba uko u Rwanda ruhagaze mu bijyanye no guha uburenganzira abaturage, ngo yagaragaje uburyo igihugu cyateye imbere, cyane cyane mu by’ubukungu.

Iyo ntumwa ya UN kandi ngo yashimye uburyo Inteko y’u Rwanda yatoye amategeko asaba inzego zitandukanye guharanira uburenganzira bwa muntu, ndetse no gushyiraho ibigo bishinzwe kubuteza imbere, nk’uko Depite Uwimanimpaye yatangaje, nyuma yo gusurwa n’itsinda rya UN riyobowe na Maina kuri uyu wa gatatu tariki 22/01/2014.

“Yashimye aho u Rwanda ruvuye n’aho rugeze ku bijyanye n’uburenganzira bwa muntu n’izindi ngamba zishyirwaho; icyadushimishije cyane natwe, ni ukuntu yagaragaje ko iterambere igihugu cyacu kigezeho rigendana n’amahirwe ahabwa Abanyarwanda n’uburenganzira buhabwa ikiremwamuntu mu nzego zose”, Depite Uwimanimpaye.

Ku ruhande rwe, Maina yavuze ko azamara icyumweru mu Rwanda aganira n’inzego zinyuranye za Leta, imiryango yigenga ndetse n’abantu ku giti cyabo; ku birebana n’uburenganzira Abanyarwanda bafite bwo gukora amahuriro mu buryo bw’amahoro no gushinga amashyirahamwe.

Yirinze ariko kugira icyo abwira itangazamakuru ku migendekere y’umurimo yatumwe; akavuga ko ateganya kuganira n’abanyamakuru ku wa mbere w’icyumweru gitaha, ubwo azaba amaze kuvugana n’abo yifuza bose.

Kuri uyu wa gatatu Maina yaganiriye n’inzego zinyuranye zirimo Urukiko rw’ikirenga, Komisiyo y’Inteko y’abadepite ishinzwe uburenganzira bwa muntu no kurwanya Jenoside, ndetse n’Urwego rw’Umuvunyi.

Simon Kamuzinzi