Aba baturage baravuga ko ibyo bazabishobozwa no kwiyemeza no guhuriza hamwe imbaraga z’ibitekerezo n’ubushobozi kuko Abanyarwanda bamaze kugaragaza ko icyo biyemeje bashimitse bakigeraho nta kabuza.

Mu mihango yo gutangiza itorero ry’abaturage ku rwego rw’umudugudu, Intore zo mu murenge wa Muhazi mu karere ka Rwamagana zahigiye ko itorero zigiye kwitorezamo amezi atandatu rizasiga babashije kwikemurira ibibazo by’iterambere n’imibereho myiza bibabangamiye.

Ibyo biyemeje birimo kwibonera ubwisungane mu kwivuza, kubaka ibyumba by’amashuri abana bo muri Muhazi bazigiramo no kujyana abana bose mu ishuri kandi bagakurikirana ko biga neza, kurwanya akarengane no kwibumbira bose mu makoperative anyuranye azabafasha gukorera hamwe bagahuza ibitekerezo n’ubushobozi bakiteza imbere.

Mu gutangiza iri torero, izi ntore z’i Muhazi zatangiranye no gushakira isaso nyayo y’imifariso bamwe muri bo bakennye no gufungurira abana amata bagaragaza ubufatanye no gukemurira hamwe ibibazo by’intore bagenzi babo baturanye.

Mu karere ka Rwamagana, tariki 17/08/2012, batangije itorero ry’intore ku rwego rw’umudugudu, itorero rizitabirwa n’abatuye umudugudu bose bagejeje ku myaka irindwi rikazamara igihe cy’amezi atandatu.

Iri torero ntirizajya riba buri munsi ahubwo abantu batuye mu mudugudu bazajya bagena iminsi runaka bazajya bahuriraho bakore gahunda bateganyije ubundi basubire mu mirimo yabo isanzwe.

Ahishakiye Jean d’Amour