Umuturage witwa Mukaremera Marie yasabye ko ingingo y’101 yavanwaho n’urupapuro yanditseho bakaruvana mu gitabo cy’Itegeko Nshinga.

Yagize ati “Ntumwa zacu twitoreye uyu ni umwanya wo gusubira mu masezerano yacu, tuje hano kubatuma ngo ingingi y’101 ikurweho nibiba ngombwa n’urupapuro yanditseho muruce, abagore batwite ngo iyo umwana yishimbije mu nda bumva yanditse inyuguti K bakumva ari Kagame, ntacyo ataduhaye.”

Naho Kandama Marie, undi muturage, we ati “Ariko Perezida Kagame afite amaso angahe ko akemurira icyarimwe ibibazo byacu! Nta mubyeyi ukigwa ku nda, nta bana bagipfa buri munsi kubera abajyanama b’ubuzima yashyizeho. Turashaka ko ingingo y’101 ivaho burundu kandi idakuweho Abanyarwanda baba bakuwe amata ku munwa, mubidufashe ntumwa zacu”.

Bizima Ananiyasi, we ati “Nta wundi twakwemerera ko ayobora iki gihugu ni yo mpamvu iyo ngingo ikurwaho burundu tukamuha manda enye z’imyaka irindwi mu myaka 28 dushaka ko ayobora azaba akeneye gusimburwa ahasigaye abandi bazaza bo tuzabahe manda”.

Akimana Musa, we yatanze igitekerezo cyatinzweho n’abadepite kugira ngo basobanukirwe neza.

Yagize ati “Ndumva iyi ngingo y’101 mwayireka ntimuyikoreho ariko mugasa nk’abayibagiwe tukikorera ingingo nshya ya 204 ivuga ko Kagame wenyine agomba gutorerwa kuyobora u Rwanda nta manda hanyuma yasimburwa tukagaruka kuri ya ngingo y’101 abazajyaho bakarebwa n’iyo ngingo.”

Abadepite bashimiye abaturage ku byifuzo byabo babizeza ko bagiye kubihuza n’ibyo abaturage bagiye batanga mu turere twose tw’igihugu ikivuyemo bakakibamenyesha.

Icyo kiganiro n’abaturage cyabimburiwe n’igikorwa cy’umuganda rusange n’igikorwa cyo gutora abunzi.

Mu mirenge 12 igize Akarere ka Kirehe, abadepite Hon Mujawamariya Berthe, Hon Rusiha Gaston na Hon Munyangeyo Théogène bamaze guhura n’abaturage mu mirenge itandatu bakaba bagiye gusura imirenge isigaye nyuma bagahura n’izindi nzego zigizwe n’abikorera, abafite ubumuga, abihaye Imana n’abandi. Uruziduko rwabo mu Karere ka Kirehe rukazasozwa tariki 11 Kanama 2015.

Servilien Mutuyimana