Mu Rwanda umuganda ni igikorwa ngaruka kwezi gikorwa ku rwego rw’igihugu, ingabo za RDF ziri hirya no hino ku isi zikaba nazo zitangiza iki gikorwa mu rwego rwo gufatanya n’abaturage ndetse n’ubuyobozi bw’ibihugu ziba zikoreramo gusukura aho batuye ndetse no kurengera ibidukikije.

Abasirikare bagize batayo ya ‘Rwanda Mechanized Infantry Battalion (RwaMechBatt1)’ ikorera muri Centrafrique batangiye umuganda kuwa 23/2/2014, aho basukuye uduce duherereye aho bakorera nka Ngaragba na Socatel, ngo bakaba bateganya no kwagura iki gikorwa basukura umujyi mukuru w’iki gihugu Bangui no mu nkengero zawo.

Ubuyobozi bw’ingabo za RDF butangaza ko izi ngabo ziri mu butumwa bwo kubungabunga amahoro muri Centrafrique, ngo ziri mu mishyikirano n’ubuyobozi bw’umujyi wa Bangui ndetse n’abaturage kugira ngo harebwe uburyo habaho ubufatanye mu gukora umuganda rusange muri iyi weekend, aho biteganyijwe ko hazasukurwa umujyi n’inkengero zawo, kugirango abaturage babe ahantu hasukuye kandi hanarengerwe ibidukikije.

Biteganyijwe ko ingabo za RDF ziri mu burumwa bw’amahoro muri iki gihugu zizifatanya n’izindi ngabo zituruka mu bindi bihugu, ubuyobozi ndetse n’abaturage; nk’uko tubikesha ubuyobozi bwa RDF.

Mu Rwanda, igikorwa cy’umuganda kimaze gufatwa nk’ingirakamaro na buri muturarwanda wese, aho gifatwa nk’inyunganizi ikomeye mu mibereho y’abaturage ndetse n’iterambere mu bukungu. Kubera ibikorwa by’umuganda kandi, umujyi wa Kigali n’igihugu muri rusange bimaze gufatwa nka bimwe mu bifite isuku ku isi.

Nkuko bitangazwa n’urubuga rwa ‘Rwandapedia’ rushinzwe gushyira ahagaragara ishusho y’iterambere ry’u Rwanda, ngo kuva mu mwaka wa 2007, igikorwa cy’umuganda kibarirwa mug aciro ka miliyoni 60 z’amadorali y’Amerika.

Dan Ngabonziza