Kuri uyu wa mbere taliki 20/01/2014, nibwo inteko ishinga amategeko ya Centrafrique yatoreye madamu Catherine Samba-Panza kuba Perezida w’inzibacyuho w’iki gihugu.

Mu birori byo kwimika uyu mu perezida w’inzibacyuho wa Centrafrique, umwe mu basirikare ba RDF boherejwe mu butumwa bw’amahoro muri iki gihugu, niwe wagaragaye nk’icyegera cya hafi (close body guard) cya Perezida Samba-Panza amucungiye umutekano.

Kuva taliki 16/01/2014, indege za gisirikare z’America (C17) zatangiye gutwara ingabo z’u Rwanda (RDF) zigiye mu butumwa bwo kubungabunga amahoro muri Repubulika ya Centrafrique (CAR).

Abasirikare b’u Rwanda boherejwe mu butumwa bw’amahoro muri Centrafrique bose bagera kuri 850 bayobowe na Lt Col Jean Paul Karangwa.

Umusirikare wa RDF niwe cyegera cya hafi cya Perezida mushya wa Centrafrique, Catherine Samba-Panza. (Photo.Al Jazeera).

Umuvugizi w’ingabo z’u Rwanda, Brig.Gen. Joseph Nzabamwita, atangaza ko izi ngabo zoherejwe muri Centrafrique arizo muri batayo ikoresha ibikoresho binini bya gisirikare, ibi bikaba bijyanye n’inshingano bahawe arizo; kurinda umutekano w’abaturage ba kiriya gihugu, guhashya umwanzi mu gihe bibaye ngombwa ndetse no gucunga umutekano w’abayobozi bakuru.

Akimara gutorerwa kuyobora iki gihugu cyazahajwe n’imvururu zishingiye ahanini ku bwoko bw’abakirisitu n’abayisilamu, perezida mushya wa Centrafrique, Catherine Samba-Panza yatangarije itangazamakuru ko yiteguye kugarura amahoro n’umutekano mu gihugu cye, ariko nanone akavuga ko hagikenewe ingabo mpuzamahanga mu kumufasha kubigeraho.

Dan Ngabonziza