Abaturage bibasiwe n’icyo kiza ni abo mu Mudugudu wa Gashongora Mu Kagari ka Nyagasenyi ho mu Murenge wa Gahara aho ibisenge by’amazu byagurutse ntihagira icyo barokora mu byari biyarimo.

Nduhirabandi Emmanuel, umwe mu basenyewe n’iyo mvura, agira ati “Nari mu nzu n’umugore wanjye n’umwana imvura iguye igisenge kiraguruka twisanga tunyagirwa duhitamo gukizwa n’amaguru”.

Akomeza agira ati “Kubera uburyo buteye ubwoba imvura yagwagamo nta kintu twirukankanye,uturibwa nari maze iminsi mvuye gupagasa twose twangiritse, ntabyo kwiyorosa matora n’imyenda byose byatwawe n’umuvu w’amazi nta cyasigaye munzu uretse isafuriya”.

Mu gihe abo baturage basenyewe bakomeje gusaba ubufasha, ubuyobozi bw’akarere bwo burimo gusaba abatahuye n’ibiza kubacumbikira mu gihe hagitegerejwe ubufasha.

Uretse inzu z’abaturage no mu ishuri ry’imyuga rya VTC St Anastase riri muri uwo Murenge wa Gahara bimwe mu byumba byaryo byasambuwe n’umuyaga.

Hahirwa Faustin, Umuyobozi w’icyo kigo, yatangarije Kigali Today ko imvura yasenye icyumba abana bariramo (Refectoire), ibyumba bitanu byigirwamo imyuga(Ateriers) na salle y’inama.

Yagize ati “Haje umuyaga uteye ubwobo igisenge cy’inzu abana bafatiramo ifunguro kigwa hasi cyose k’ubw’amahirwe nta bana bari barimo. Gusa, hari abana bari bahungabanye kubera ibyo babonaga, twabagejeje kwa muganga ubu borohewe bavuyeyo nta mwana ufite ikibazo”.

Ntambara John, Umunyamabanga Nshingwabikorwa w’Umurenge wa Gahara, arahumuriza abaturage ababwira ko hari gushakwa uburyo bwihutirwa abahuye n’ibiza bafashwa, akavuga ko baba bacumbikiwe na bagenzi babo.

Uretse umurenge, nyuma y’iyo mvura, Ubuyobozi bw’Akarere ka Kirehe hamwe n’ingabo na Polisi basuye abo baturage n’icyo kigo cyahuye n’ibiza barabahumuriza maze basaba abaturage gucumbira bagenzi babo bahuye n’ibiza mu gihe hagishakishwa uko babafasha.