Byavugiwe mu Karere ka Kamonyi mu Murenge wa Nyamiyaga, Akagari ka Bibungo, Umudugudu wa Nyamurasa, aho abaturage b’uwo Mudugudu bahuriye hamwe baganura ibikorwa by’indashyikirwa byagezeho.

Izi mpuguke zibihera ku bikorwa byarangaga umuco Nyarwanda, imyemerere, imibanire n’uburyo Abanyarwanda bari bazi kuvumbura ubwenge bubafasha mu buzima bwa buri munsi.

Dr. Rusa Bagirishya, umuhanga mu by’ubukungu na Politiki, akaba n’impuguke mu buhinzi n’ubworozi, avuga ko ahereye ku buryo abashumba bavumbuye uburyo bwo guteka badakoresheje amazi, cyangwa ibindi birungo kandi ibyo bateguye bikaryoha, bigaragaza ko kwari ukuvumbura kandi bifite ishingiro.

Agira ati, "Ibinyabijumba byahishwaga n’umwuka, kandi ubu hariho ubuhanga bwo gutekesha umwuka, turabwishyura kubera ikoranabuhanga, birakwiye ko urubyiruko rwacu rureba kure umuganura nk’uyu rukawigiramo kugarura ibyatakaye bisigaye bifitiye abandi akamaro kandi byari ibyacu badutwaye bakabihindura tukaba dusigaye tubyishyura akaba ari bo biteza imbere".

Ubwo buryo Dr. Rusa avuga ko bwitwa ‘Kotsa Runonko,’ aho abashumba bafataga ibinonko, bakabyubakamo ifuru gakondo, bagashaka ibyatsi bakabicanira bigatukura, bagakuramo umuriro bagashyiramo ibinyabijumba bagahonda bya binonko, maze ubushyuhe bwabyo bugahisha bya binyabijumba, bakabifungura kandi bakagira ubuzima bwiza kuko byabaga byatetswe mu buryo bwiza.

Agira ati, "Uyu munsi ibitekesheje amavuta biratuma uburwayi burimo na kanseri burushaho kwiyongera, mu gihe abaryaga ibyokeje runonko bo ntaburwayi bashoboraga kugira kuko babifuuguraga nta kinyabutabire na kimwe cyongewemo, bikaba bikwiye guherwaho bigaragaza ubuhanga bw’Abanyarwanda".

Naho Prof. Nyagahene umuhanga mu by’amateka n’imibereho y’abantu, ahamya ko kurya ibyokeje mu binonko byarindaga indwara kuko byabaga bidatekeshejwe amavuta ahubwo byahishwaga n’umwuka, ubu bikaba byarahinduwemo amafuru ya kizungu, ahenze uyu munsi.

Agira ati, "Ibyo twataye abandi babibyaje umusaruro, natwe birakwiye ko ababyiruka babyigiraho maze bagahindura ubuzima bushya buri imbere".

Naho Rutanga rw’Amaboko Imandwa nkuru y’Urwanda akaba n’umuyobozi mukuru w’Ikigo Nyarwanda cy’Ubuzima bushingiye ku muco, avuga ko abatangiye runonko barushagaho kunga ubumwe bagakundana, kandi ntibacuranwe, bigatuma ubumwe bw’Abanyarwanda butangirira mu babyiruka kuko abashumba benshi babaga ari urubyiruko.

Agira ati, "Abasangiye runonko bakomezaga kubaka ubumwe bwabo hagati yabo maze bugasakara no mu bandi, natwe nidusubiza Umunyarwanda imbere tuzakomeza kubaka ubumwe no kubaka ubukungu butajegajega".

Prof. Nyagahene avuga ko agiye kwandika igitabo kuri ubu buhanga bw’Abanyarwanda ba kera, n’uko byatezwa imbere, kugira ngo bizafashe abakora ubushakashatsi kurushaho gucengera ibikenewe kuvomwa mu muco, byafasha ababyiruka gutera imbere mu muco usigasira ubumwe n’iterambere.