Impuguke n’abarimu bigisha muri Kaminuza zivuga ko umuryango wa CEPGL utangira mu mwaka w’1976 wari ufite ubushake bwo guteza imbere akarere ugakomwa mu nkokora n’ibibazo by’umutekano mucye waranze akarere kuva 1993 byatumye uhagarara ndetse n’amafaranga wakoreshaga agatwarwa n’igihugu kimwe.

Iyo hakozwe igenzura ku mishinga uyu muryango washinze irimo Banki ya CEPGL yitwa BDEGL, ikigo gitanga amashanyarazi SINELAC hamwe n’indi mishinga iteza imbere ubushakashatsi n’ubuhinzi.

Izi mpuguke zahuriye mu nama y’iminsi ibiri yabereye mu karere ka Rubavu kuva tariki 30/01/2014 zisanga hakwiye kongerwa imbaraga mu gufasha imishinga gukora neza inshingano zayo mu guteza imbere abatuye akarere maze aho ifite imicungire mibi hagakosorwa nkuko byagaragaye kuri SINELAC.

Impuguke n’abarimu bigisha muri za Kaminuza basabye CEPGL kongerera ubushoabozi ikigo cya SINELAC mu kongera ingufu z’amashanyarazi zikoreshwa mu karere, gukora ibishoboka mu gushakira umuti ibibazo bihungabanya umutekano hamwe no guhuriza hamwe ibihugu bihuriye muri uyu muryango bigakorera hamwe bisangira ibitekerezo n’inyungu.

Impugucye n’abarimu bigisha muri za Kaminuza mu Rwanda, u Burundi na Repubulika Iharanira Demokarasi ya Congo, Uganda, Zambia hamwe n’izigisha muri Kaminuza zo ku mugabane w’Uburayi zitabiriye iyi nama zisanga ibikorwa bya CEPGL bitazwi bagasaba ko yarushaho kwimenyekanisha haba mu bitangazamakuru n’urubyiruko rwiga muri Kaminuza kugira ngo barusheho kungurana ibitekerezo byawuteza imbere.

Ikibazo cy’impunzi n’imitwe yitwaza intwaro ngo nibyo nyirabayazana mu guhungabanya umutekano mu karere kandi ngo CEPGL nk’umuryango ukorera mu karere wagombye gufasha ibihugu biwugize gucyemura ikibazo cy’impunzi no kurwanya imitwe yitwaza intwaro by’umwihariko FDLR.

Zimwe mu mpuguke zaturutse ku mugabane w’Uburayi zisanga CEPGL iramutse yishyize hamwe nk’uko umuryango w’ibihugu by’Uburayi wihuje byafasha gucyemura ibibazo bigaragara mu karere cyane cyane mu kugarura amahoro no gukemura ikibazo cy’imiyoborere hamwe gufasha abaturage mu buhahirane.

Bimwe mu bibazo impuguke zibanzeho mu kwiga ku mikorere ya CEPGL birimo kureba aho umuryango ugeze mu guteza imbere ubukungu ku batuye ibihugu ukoreramo, kugaragaza uruhare wagira mu kugarura amahoro n’umutekano mu karere mu gihe kirambye, n’aho wagombye kuba ugeze mu gihe cy’imyaka 50 kuva utangiye mu mwaka w’1976.

Iyi nama yateguwe n’ikigo cy’igihugu gishinzwe imiyoborere mu Rwanda (RGB), ubuyobozi bwa CEPGL bushima kuba itekerezwaho ndetse bigahagurutsa impugucye kuganira ku mikorere yayo; nk’uko byatangajwe n’umunyamabanga wa CEPGL, Tuyaga Herman.

Yagize ati «dusanze ibyo dukora bikurikiranwa n’inzego zitandukanye; nk’uko byagaragaye mu biganiro kandi n’inama zatanzwe zizadufasha gushyira mu bikorwa ibiteza imbere akarere, naho abari mu biganiro tubizeyeho ubuvugizi ku buryo bamwe mu bayobozi ba Kaminuza bagiye gusobanurira abanyeshuri inshingano zacu ndetse bamwe tugafashanya hagendewe ku bikorwa dukora urubyiruko rwagiramo uruhare».

Zimwe mu mpuguke zivuga ko guhuza abanyeshuri bavuye mu bihugu bigize umuryango wa CEPGL hari ibyo byahindura ku myumvire y’urubyiruko rutuye ibihugu, ikindi ngo kubera ubuyobozi butandukanye mu bihugu byajya bifasha urubyiruko gusangira ibitekerezo no gushimangira imiyoborere myiza no gusangira ibitekerezo mu kubaka umuryango.

Sylidio Sebuharara