Izi ngabo zari zifite inshingano yo guhashya umutwe wa FDLR wari warabujije abaturage amahwemo zemeza ko ingabo za Congo bafatanyaga ziciyemo ibice ku buryo imikoranire itagendaga neza.

Igikorwa cyo gushyira hamwe kw’ingabo z’u Rwanda n’ingabo za Congo cyaciye intege umutwe wa FDLR ndetse abarwanyi bayo barenga 4000 barataha, ariko FDLR irimo kwisuganya ibifashijwemo n’intambara irimo kubera muri Congo.

Abaturage ingabo z’u Rwanda zacungiraga umutekano bavuga ko umutwe wa FDLR ushobora kongera ibikorwa byo guhohotera abaturage cyane ko ingabo zacungaga umutekano zitahiye.

Umuvugizi w’ingabo z’u Rwanda, Brig.Gen. Nzabamwita yatangarije itangazamakuru ko kugarura izi ngabo zabanaga n’ingabo za Congo bigaragaza ko Congo yirengagije ukuri izi neza ishinja u Rwanda gufatanya na M23 kandi u Rwanda ruyifasha guhashya imitwe ihungabanya
umutekano.

Ubu bufatanye hagati y’ingabo z’u Rwanda n’iza Congo bwatangiye muri 2009 habaye ubwumvikane hagati y’u Rwanda na Congo ndetse na MONUSCO.

Kuva iyi gahunda yatangira muri Congo hagiye ibyiciro bitatu harimo iki gitashye cyagiye mu kwezi ka kabiri uyu mwaka kandi batashye uko bagiye ari 357.
Ingabo za Congo zaherekeje iz’u Rwanda kugera ku mupaka wa Karuhanga ndetse ziherekejwe na Brig. Gen. Bauma Abamba umujenerali uyobora ingabo za Congo muri Ructhuro wari ukuriye n’izi ngabo zatashye.

Yakira izi ngabo, umugaba mukuru w’ingabo z’u Rwanda yatangaje ko u Rwanda ruzakomeza koganira na Congo kugira ngo ibibazo by’amacakubiri biri mu ngabo za Congo nibirangira hazasubukurwe ibikorwa byo kurwanya umutwe wa FDLR ufite ibirindiro mu ntara ya Kivu.

Sylidio Sebuharara